Kremtimi u festës së Çlirimit, e cila për të majtën shqiptare është gur kilometrik në historinë e saj, është shënuar me “incidentin”e rebelimit ndaj Ramës të veteranëve të luftës. Disa prej tyre kanë gjetur rastin për t’i shprehur kundërshtinë e tyre në lidhje me nderimin që iu bë Mid’hat Frashërit, ish-kreut të Ballit, duke iu kthyer eshtrat e rivarrosur në atdhe.
“Populli shqiptar bëri luftë heroike për çlirimin e vendit me në krye gjeniun Enver Hoxha. Kjo luftë fitimtare e shpëtoi Shqipërinë. Në 14 nëntor 2018 populli shqiptar pa edhe dëgjoi ceremoninë për kthimin e eshtrave të Mid’hat Frashërit. Ky akt është shprehja e qartë e rehabilitimit të kolaboracionistit. Qeveria rilindase socialiste e Ramës është neoballiste dhe neokolaboracioniste. Poshtë qeveria neoballiste e Edi Ramës. Balli Kombëtar përfaqësonte interesat e borgjezisë. Balli Kombëtar zgjodhi bashkëpunimin me nazistët”, u shpreh gjatë fjalës së tij kreu i Partisë Komuniste, Qemal Çiçollari.
Ndërkohë, e majta e përfaqsuar nga PS – LSI, vijoi me homazhet korteziale si çdo vit, në nderim të të rënëve të luftës. Sigurisht mungonte PD, që në këtë pikë tregohet gjithnjë e djathtë. /tesheshi.com /
