Figura të mazhorancës kanë përkujtuar me ceremoni çlirimin e Tiranës (17 nëntor), duke e shfrytëzuar këtë në goditje ndaj opozitës, që sipas tyre po është sot në anën e gabuar të historisë, me kundërvënien ndaj Perëndimit.
Ishte zv/kryeministri Braçe, një ithtar i luftës partizane, i cili aludoi se opozita e sotme janë kuislingët e së djeshmes.
“Ia vlen të kujtojmë ata që kishin të mundur që të ishin në krahun e duhur dhe bënë zgjedhjen e kundërt të turpshme të atyre që bashkëpunuan me fashizmin dhe nazizmin.
Po e përsërisin veten prapë. Ka pasur qeveri që kanë bashkëpunuar me nazizmin, i shpallën luftë SHBA-së, Britanisë, Francës në një akt turpi në mbështetje të fashizmit. Po e përsërisin veten prapë sot, që gjejnë kurajon që për interesa të ngushta dhe për pushtet, t’i shpallin luftë SHBA-së, Britanisë, Francës dhe të gjithë Perëndimit se duan pak pushtet. Edhe atëherë pushteti i bëri bashkë me fashizmin edhe sot pushteti i bën bashkë kundër Perëndimit”, tha Braçe.
Kryebashkiaku Veliaj në krah të tij, tha se “punët e mira i pengojmë vetë, keq për Shqipërinë flasim vetë, po ashtu edhe sabotimin. Kur ne shqiptarët bëhemi bashkë nuk ka betejë që nuk e fitojmë. Kërkohet nga secili mos i bëjmë vetes atë që nuk e kanë bërë edhe pushtuesi”. /tesheshi.com/
