Një mundësi tjetër i ka dhënë Cleveland-it fitorja e para disa orëve për të shpresuar ende se mund ta fitojë NBA-in për këtë sezon.
Golden State Warriors është dorëzuar, edhe pse në fushën e vet, ndaj formës së jashtëzakonshme të dy lojtarëve kundërshtarë, LeBron James-it dhe Kyrie Irving-ut. Të dy ata shënuan nga 41 pikë, duke u bërë të parët shokë skuadre që shënojnë njëkohësisht më tepër se 40 pikë në një ndeshje finale të NBA-it.
Pas pesë takimeve, Warriors kryesojnë 3-2, teksa Cleveland-i fitoi në takimin e fundit 112-97.
Vendasit e Golden State-it kryesuan vetëm në periodën e parë të lojës, për të dalë të humbur në tre të tjerat. Ata vuajtën formën jo të mirë të Steph Curry-t, që shënoi vetëm 25 pikë, por edhe mungesën e Draymond Green-it, të pezulluar.
Lojtarët e Cleveland-it i shkaktuan Golden State-it humbjen e katërt sezonale në fushën e tyre, e këtë të enjte i presin në Kleveland, duke kërkuar ta çojnë serinë e finaleve në 3-3.
Shpresa është po ashtu te Golden State-i se mund ta përsërisin historinë e vjetshme, ku fituan pikërisht në ndeshjen e gjashtë të finaleve, duke marrë trofeun e NBA-it. /tesheshi.com/
