Tekniku italian ka nënshkruar sot një kontratë të re katërvjeçare me Lestër Sitin, skuadrën të cilën e çoi pabesueshmërisht drejt titullit kampion në Premier League sezonin e shkuar.
Ranieri pati para pak muajsh kulmin e karrierës së tij si trajner, duke fituar trofeun në kampionatin anglez me një skuadër që rregullisht luan për mbijetesë. Suksesi i tij erdhi pas një disfate me kombëtaren greke, të cilën ai do ta drejtonte për vetëm katër takime.
Pas Schmeichel-it, Morgan-it dhe Vardy-t, lojtarëve kyç të ekipit, i ka ardhur radha Ranieri-t ta zgjasë kontratën.
Kapiteni Morgan do ta quante lajm fantastik kontratën e re të Ranieri-t, duke thënë gjithashtu, “Ai luajti një rol të madh në suksesin tonë sezonin e shkuar, dhe të gjithë djemtë e mbështesin atë.”
E sa për objektivat, italiani ka përsëritur saktësisht atë të një sezoni më parë, të sigurimit fillimisht të 40 pikëve.
Sidoqoftë, ai e pranon se do të përpiqet që ekipi i tij të bëjë një paraqitje sa më të mirë.
“Do ta mbrojmë shumë fort trofeun tonë, por mendoj se janë ekipet e mëdha tani, që sezonin e shkuar nuk e di pse bënë gabime. Ato tashmë duhet të fitojnë, sepse kanë shpenzuar shumë para dhe janë mësuar duke fituar. Nuk mund ta pranojnë ta humbasin titullin për të dytin vit radhazi.” /tesheshi.com/
