Mançester Siti i Guardiola-s ka nënshkruar më në fund me portierin kilian Claudio Bravo, një transferim që pritej prej ditësh.
Gardiani i portës së Barcelonës në dy vitet e shkuara do të jetë me shumë mundësi zgjedhja e parë në formacionin e Mançester Sitit, i parapëlqyer ndaj Hart-it dhe Caballero-s.
Shuma e transferimit sillet te 18 milionë euro, dhe kontrata është katërvjeçare. Tetë janë titujt e fituar nga Bravo me katalanasit që nga 2014-ta, ndërsa gjatë sezonit të parë ai do të bëhej pjesë dhe e formacionit më të mirë të kampionatit spanjoll.
Bravo është gjithashtu portieri i kombëtares kiliane, me të cilën ka fituar Kupën e Amerikës.
“Jam shumë krenar që i bashkohem Mançester Sitit. E di se klubi po ndërton diçka tepër të veçantë, dhe shpresoj të jem pjesë e shumë sukseseve në vitet e ardhshme. Nuk është e lehtë të lësh një klub si Barcelona, ku pata dy vite fantastike, por mundësia për të punuar me Pep Guardiola-n nuk mund të hidhej poshtë,” ka thënë tashmë ish-portieri i katalanasve.
Me ardhjen e tij, bëhet akoma më e vështirë situata e portierit të përfaqësueses angleze, Joe Hart, që i ulur në stol do kërkojë medoemos një klub tjetër për t’u aktivizuar rregullisht.
Ndërkohë, Barcelona ka marrë nga Ajaksi holandezin Jasper Cillessen për të zëvendësuar Bravo-n. /tesheshi.com/
