Nga Blendi Gashi
As pas darkës së shtruar të dielën mbrëma në vilën e Behgjet Pacollit, politika kosovare nuk arriti të jetë unike sa i përket ecjes më tutje të Demarkacionit, konkretisht procedimit për në seancë plenare ku deputetët do kenë fjalën e fundit.
Të gjitha grupet parlamentare, përjashtuar LDK-në votuan që në seancën plenare të së enjtes të mos jetë pikë e rendit të ditës ratifikimi i marrëveshjes për demarkimin e kufirit me shtetin malazez, me arsyetimin se mungon konsensusi nacional.
Këtë e konfirmoi kryekuvendari Kadri Veseli.
“Shtyrja ka ndodhë për arsyen e arritjes së një konsensusi nacional. Asgjë nuk ka të jashtëzakonshme. Çështja e demarkacionit është interes i subjektivitetit ndërkombëtar të shtetësisë së Kosovs përkrah BE-së dhe është një mesazh i qartë në drejtimin që do të ecë Kosova. Nuk është vetëm për liberalizimin e vizave por edhe një drejtim pozitiv i partneritetit të vendeve të NATO-s. Patëm një unanimitet për këtë pik, përveç LDK-së, që kishte një reaksion që ka të bëjë me të kaluarën. Jemi duke punuar shumë seriozisht që të arrijmë një zgjedhje të konsensusit nacional. Jemi duke lëvizur dalë ngadalë por sigurt në vendimmarrje të shtetit. Kuvendi të mos jetë për skena teatrale për të krijuar frustrime dhe shqetësime tek qytetarët”, tha Veseli pas mbledhjes së Kryesisë.
Deklarata e Veselit që ngacmon LDK-në dhe lë pas shumë të panjohura…
Veseli përmes kësaj deklarate përveç që ngacmon LDK-në, njëherit lë pas shumë pikëpuyetje duke bërë tejet të paqartë se kur do vendoset për fatin e Demarkacionit.
Ai nuk tregoi se me kë konkretisht po duan të arrijnë konsensus nacional, me AAK-në e NISMA-n apo edhe me Vetëvendosjen, pasi dihet se LDK ashtu si dhe PDK janë pro ratifikimit të Demarkacionit.
Me dy partitë e para PDK mund ta ketë më të ketë të lehtë.
Ramushi dhe partia e tij AAK edhe pse deklarohet se nuk japin votë për versionin e nënshkruar më 2015 nga Thaçi, mund të ndrrojnë qëndrim nëse kërcënohen me prishje të koalicionit dhe nëse Fatmir Limaj dhe NISMA e tij pajtohen që poashtu të japin votat, gjithmonë nëse lihet mundësia e rishikimit të gabimeve, ku më pas do arsyetoheshin nga kritikat që mund të pasojnë për ndërrim qëndrimi nga ana e tyre.
Sa i përket një konsensusi me Vetëvendosjen vështirë mund të ketë edhe pse kjo parti tashmë është buzë ndarjes në dy grupe parlamentare. Përkundër kësaj dy “krahët” kanë deklaruar pas janë njëzëri për temat e mëdha.
Po cili mund të jetë konsensusi me Listën Serbe?
Padyshim se assesi nuk duhet harruar partinë nga minoriteti serb, Listën Serbe në konsensusin që po synohet të arrihet për ratifikimin e Demarkacionit.
Kjo parti ende nuk e ka bërë të qartë qëndrimin e saj, për çka deputeti Igor Simiç ka thënë se nuk kanë pasur kurrfarë konsulta me partitë shqiptare për temën në fjalë.
Edhe pse Simiç ka thënë se Demarkacioni nuk lidhet me formimin e Asociacionit të Komunave me Shumicë serbe apo siç njihet edhe si “Zajednica”, dhe se nuk do të tregtojnë, është e qartë se “Srpska” nuk do t’i japë votat e saj pa përfituar asgjë.
Por kjo mund të jetë vetëm kërkesa bazë, kurse kushte tjera mund të jenë që “Srpska” të ketë një zv. komandant të Forcave të Sigurisë së Kosovës, një zv.drejtor të Agjencisë Kosovare të Inteligjencës dhe një zv. komandant të policisë. Asnjë prej këtyre pozitave nuk parashihet t’i takojnë ndonjë pakice me ligje e Kushtetutë të Kosovës.
Andaj duke parë se konsensusi nacional nuk u arrit për më shumë se tre vite, vështirë s mund të arrihet brenda një jave. E vetmja zgjidhje për ratifikimin e Demarkacionit mbetet lëshimi pe nga Ramushi dhe partia e tij si dhe nga NISMA e Limajt.
Kujtojmë se për ratifikimin e Demarkacionit me Malin e Zi, e cila është marrëveshje ndërkombëtare për Kosovën, nevojiten dy të tretat e votave të deputetëve të Kuvendit të Kosovës, i cili ka 120 ulëse. /tesheshi.com/
