Ilir Meta ka një marrëdhënie të ngushtë me Ramush Haradinajn.
Prej kohësh dy liderët politikë jo vetëm që shkëmbejnë mesazhe të afërta por edhe marrin pjesë në takime e samite të ndërsjellta të partive të tyre.
Në Konventën e dhjetorit të LSI-së në Tiranë, mungoi aleati kryesor Edi Rama, ppr jo Ramush Haradinaj që përshëndeti posaçërisht.
Ndërkohë, Meta edhe pse reagoi menjëherë pas ndalimit të liderit të AAK-së në Francë, dje, në mesin e acarit ka nxitur për në Prishtinë ku ka dalë publikisht me udhëheqësit e Aleancës për Ardhmërinë e Kosovës, në një performancë më shumë politike sesa njerëzore, edhe pse një pjesë e përfaqësuesve ishin veshur si për fundjavë.
Kjo pasi nëse do të kishte një takim kordial, atëherë Meta do të shkonte në Gllogjan në Kullën e Haradinajve apo edhe në Prishtinë, në familjen e vogël të Ramushit.
Bëri përshtypje se gjatë deklaratës së tij nga Prishtina, Meta ka thumbuar edhe aleatin e tij Edi Rama, në lidhje me marrëdhëniet tashmë të afruara me kryeministrin serb, Aleksandër Vuçiç.
Një ditë më parë, Ramën për këtë e sulmoi edhe kreu i Partisë Demokratike, Lulzim Basha.
Sipas të gjitha gjasave, një material për betejën në Tiranë do të bëhet edhe realiteti Tiranë-Beograd. Të paktën sa të zgjidhet çështja “Haradinaj” por edhe më tej, kur gjërat do të vështirësohen edhe më tutje, kur në Mitrovicë është ngritur muri i stërmadh dhe ndarja e Kosovës po vjen si çmim i ofruar nga Moska për një deal të ri me Donald Trump-in.
Por problemi shtrohej se përse Ilir Meta foli dje në Prishtinë dhe me kë e kishte?
Nëse do ta kishte vetëm me Edi Ramën, mund ta bënte në Tiranë dhe në selinë e LSI-së; njëherë duke nxjerrë Luan Ramën, më pas Petrit Vasilin dhe në fund me një dalje “rastësore” para gazetarëve.
Por dalja në Prishtinë merr një peshë më të madhe, duke llogaritur këtu se edhe Ramush Haradinaj në një farë mënyrë është kthyer në një problem “ndërkombëtar” që kur ka hapur çështjen e Demarkacionit dhe po e mban fuqishëm.
Sipas të gjitha gjasave, Ilir Meta e ka pasur ndaj atyre qarqeve politike që kanë nxitur një raport të ri Tiranë-Beograd dhe po udhëheqin një proces krejt të ri në Ballkanin perëndimor, i cili si shtrat bazik të saj ka pastrimin e politikës nga elementët dhe njerëzit që kanë abuzuar me pushtetin.
Ilir Meta, ka dashur të japë një mesazh që ai nuk është një “ujk”i vetmuar i politikës shqiptare, por pjesë e një “kopeje” ustallarësh që askush nuk mund t’i neutralizojë sa hap e mbyll sytë.
Ilir Meta iu ka bërë të ditur qendrave që e sulmojnë atë, ku nuk do shumë mend për ta kuptuar që është Berlini dhe kancelarja Merkel, që nëse ajo do të largojë kaq kollaj atë dhe kolegët e tij, ai ia bën gjëmën duke prishur procesin e dialogut Tiranë-Beograd, Prishtinë-Beograd, apo edhe të proceseve të tjera.
Pra Ilir Meta ka dhënë një mesazh të koduar se nuk është një pengesë e lehtë për t’u larguar me gjykatë speciale, por që ashtu si Ramushi janë lojtarë të fortë që mund të trondisin ekuilibrat që aq me kujdes janë ngritur prej tre vjetësh…/tesheshi.com/
