Ka bërë përshtypje në opinionin publik fakti se, edhe pse ka pasur dy deklarata të ambasadorit amerikan Donald Lu në favor të opozitës për rastin “Tahiri”, as opozita e as qarqet pranë saj nuk e kanë mirëpritur këtë qëndrim.
Si para procesit ashtu edhe pas gjyqit të djeshëm në Apel, Lu deklaroi se ka “dyshime se ka presion dhe tentativë për rryshfet ndaj gjyqtarëve” .
Ndërkohë, tjetër pjesë e deklaratës është ajo që “gjykata duhet të gjykojë në bazë të provave”.
Pra në një farë mënyre kemi të bëjmë me një qëndrim politik i cili mund të shërbejë si presion pozitiv ndaj çdo tentative për një ndikim politik të “procesit Tahiri”.
Kjo është deklarata e parë e ambasadorit Lu përpara një procesi gjyqësor.
Deri tani, ambasada amerikane në Tiranë ka mbështetur lëvizjet politike që kanë çuar në zhveshjen politike të personave të akuzuar nga drejtësia.
Saimir Tahiri nuk është as de fakto dhe as de jure një politikan a zyrtar tashmë. Ai është një qytetar i thjeshtë pa asnjë lloj imuniteti dhe pse po gjykohet për punën e tij si ish-qeveritar.
Po si mund të përkthehet deklarata e Lu-së dhe si mund të ndikojë ajo politikisht?
Një javë më pare, qarqe pranë ish-kryeministrit Sali Berisha, pasi sulmuan egërsisht Donald Lu-në, përhapën lajme se ambasadori amerikan do të ikë shpejt nga Shqipëria dhe do të “degdiset” në Kirgistan, ndërsa në Tiranë do të vijë një “skifter” i Trump.
Në fakt të gjitha këto lajme nuk janë gjë tjetër vetëm fjalë koridoresh, pasi deri tani nuk ka ende një vendim zyrtar për emërim ambasadori.
Nga ana tjetër, ambasadori quhet i emëruar kur Senati Amerikan do të japë OK për miratimin e dekretit Presidencial. Pas kësaj ka procedura që zgjasin gati një vit për të ardhur në Shqipëri kryediplomati i ri.
Kështu ngjau edhe me Alexandër Arvizu-n: ai qëndroi në Shqipëri edhe një vit më pas si u emërua Donald Lu nga Senati.
Sipas gjasave, kjo skemë do të zbatohet edhe në Tiranë dhe këtë e tha vetë ambasadori a merikan në Portokalli, ku me një shaka serioze deklaroi se do të qëndrojë deri sa të përfundojnë në pranga të gjithë “peshqit e mëdhenj”. Deklaratë që realisht tronditi politikën, ngaqë vala e ndëshkueshmërisë së korrupsionit në politikë do të ketë shtytjen e Uashingtonit zyrtar.
Dy deklaratat e ambasadorit amerikan ndaj procesit “Tahiri”, padyshim që kanë qenë një sinjal i qartë politik.
Sinjal që nëse shikohet me vëmendje janë një “dorë e shtrirë” ndaj Lulzim Bashës për t’i dhënë kreut të opozitës një shans nga ana e ndërkombëtarëve.
Dhe këto deklarata u shoqëruan edhe me një performancë publike, madje duke kërcyer edhe “Baftjarin” në një festë ku ishin të pranishëm Ilir Meta, Lulzim Basha dhe Fatmir Mediu, tre kundërshtarë të rëndësishëm të.
Qëndrimet e ambasadorit amerikan duken se janë hapur një mesazh për opozitën, që kjo e fundit të ofrojë një armëpushim ndaj sulmeve që i bëhen atij, duke ofruar shfaqje që publikisht nuk e kanë ndihmuar Donald Lu-në në imazh.
Si deklarata e dykuptimtë për Tahirin ashtu edhe kërcimi i “Baftjarit”, duket se nuk janë thjesht rutinë, por një lëvizje diplomatike e menduar të cilën duket se e ka kuptuar qartë ish-kryeministri Sali Berisha, por edhe Lulzim Basha, i cili ka kontakte më direkte me ndërkombëtarët.
Dy përfaqësuesit e lartë të opozitës dhanë një sinjal të fortë dje në mbledhjen e grupit parlamentar që u lexua si një përgjigje ndaj sinjaleve të Lu-së.
Nga mbledhja u furnizuan mediat me njoftime se deputetët të PD-së kanë kërkuar djegien e mandateve dhe nisjen e revoltës ndaj qeverisë, por këto zëra janë shuar nga Sali Berisha dhe Lulzim Basha.
Pra selia blu i ka dërguar mesazh Lu-së se nuk mjaftohej me qëndrimet e dykuptimta për Tahirin. Ata kërkojnë më shumë. Dhe se kush është kjo “më shumë” e ka dhënë sot në rrjetet sociale një zë shumë i afërt mediatik i ish-kryeministrit Sali Berisha.
Ai shkruan se “këto ditë pritet edhe arrestimi i Saimir Tahirit, por edhe largimi i Fatmir Xhafajt”. Gjithçka pritet nga deponimi i “financierit” të Habilajve, Nazer Seiti.
Vetë prokurori i krimeve të Rënda që ka në dorë dosjen “Tahiri”, Besim Hajdarmataj ka qenë dje në Katania dhe ka marrë në pyetje Seitin.
Ajo dëshmi shpresohet se do të jetë karta e radhës e opozitës për të ushqyer luftën politike, sidomos pas djegies së kartës “Babale”… /tesheshi.com/
