Edi Rama, ka prekur “vijën e kuqe” dje, ndërkohë që nuk e ka bërë asnjëherë që kur ka hyrë në koalicion me Ilir Metën, pra që në vitin 2013.
Kryeministri ka hyrë në “territorin e çliruar të LSI-së” ku as Berisha e as ndonjë politikan tjetër nuk ka guxuar më parë, pasi e kanë parë edhe të kotë.
Bëhet fjalë për Skraparin e Ilir Metës (por dhe të Riza Cerovës, Mustafa Nanos e të tjerë emrave), aty ku është kthyer si një legjendë urbane “besëlidhja” e banorëve të kësaj zone me kryetarin e Parlamentit, e shprehur kjo lloj “besëlidhjeje” dhe në vargjet e njohura të një kënge të Ylli Bakës me refrenin e famshëm: “Kush i qan hallet e mija? Ilir Meta, LSI-ja”.
Edi Rama maksimumi ka hyrë deri në Poliçan, “krahinën autonome” të Skraparit, ku një oficer policie, Adriatik Zotkaj, me ndihmën edhe të PS-së, natyrisht, ia shkëputi Metës qytetin që prodhonte kallashin, duke e ndarë krahinën në dy pjesë.
Meta, më pas u hakmorr politikisht duke i marrë PS-së me marrëveshje tërë Beratin si qark, i cili tradicionalisht ka qenë bastion i PS-së me kundërshtar të fortë LSI-së, sidomos në vitet 2009-2013, kur Meta ishte në koalicion me Berishën.
Por Edi Rama, në të gjithë këtë situatë dje i ka hipur makinës dhe është ulur “gju më gju” në Çorovodë, në zemrën e zonës së influencës së aleatit të tij-rival, Ilir Metës.
Lëvizja e Ramës është bërë pikërisht pas një deklarate të Erisa Xhixhos, zv.ministre e Integrimit dhe një nga drejtueset e LSI-së, e cila tha se kjo forcë politike do të kërkojë që të ketë kryeministrin në zgjedhjet e 2017-ës, duke e zyrtarizuar atë që po deklarojnë prej disa javësh “rivalët” e Ilir Metës për kryetarë të LSI-së.
Pikërisht pas kësaj deklarate, Edi Rama hodhi një batutë që nga të gjithë qarqet pritet të merret si një shpoti politike ndaj Ilir Metës.
“Vetëm në inate skraparlinjsh unë nuk përzihem se nuk ua zgjidh dot. Se me inatin tuaj nuk hahet njeriu që ka logjikë”, deklaroi Edi Rama ndërsa po zhvillonte një “town hall” në Skrapar.
Në vëzhgues i kujdesshëm politik do ta vinte re se deklarata e Ramës është thuajse lineare me atë të Fatos Nanos 12 vjet më parë kur thoshte se “LSI-ja është një lëvizje e skraparlinjve të inatosur”.
Ndërsa Edi Rama e ka përforcuar këtë, siç e bën edhe në “Kurban” kur përshkruan Ilir Metën, dhe e ka bërë fiks brenda “zonës së zjarrit”.
Kushdo që vëzhgon politikën e shikon qartë se kjo nuk është gjë tjetër por një “deklarim lufte”, një sfidë e hapur e Edi Ramës ndaj aleatit të tij, që pritet të sjellë një trazirë të vërtetë brenda koalicionit dhe që zhurmën normalisht do ta japë në fillimin e javës në të gjitha portalet e rrjetet sociale.
Duket se falsiteti i një bashkëjetese nuk po mundet të fshihet e të shitet si normalitet. Tashmë përplasja ka dalë në sipërfaqe. Radhën e ka Meta për t’iu kundërpërgjigjur…/tesheshi.com/
