Kryetarja e Dhomës së Përfaqësuesve të SHBA-së Nancy Pelosi mbërriti në Armeni të shtunën për një vizitë të paralajmëruar një ditë më parë, pasi vendi përballet me përplasje të dhunshme në kufirin e tij me Azerbajxhanin.
Pelosi, e cila është zyrtarja më e lartë amerikane që viziton Jerevanin që nga pavarësia e vendit të vogël të Kaukazit në 1991, e quajti vizitën e saj “një simbol të fortë të përkushtimit të palëkundur të Shteteve të Bashkuara për një Armeni paqësore dhe të begatë“.
Kjo vizitë tre-ditore “do të luajë një rol të madh në garantimin e sigurisë sonë,” u tha gazetarëve kryetarja e parlamentit armen Alen Simonyan përpara mbërritjes së saj.
Vizita e zyrtares amerikane bëhet ndërkohë që rajoni me rëndësi strategjike kryesisht për shkak se hidrokarburet e Kaspikut transportohen përmes tij, po përballet me fërkime mes ndikimit të Turqisë që mbështet Azerbajxhanin dhe atij të Rusisë, e cila teorikisht është garantuese e Armenisë ku ka një bazë ushtarake, por është shumë e zënë në Ukrainë.
Perëndimorët janë të pranishëm në procesin e paqes në kuadër të Grupit Minsk të OSBE-së.
Më shumë se 200 njerëz janë vrarë në luftimet e fundit midis trupave armene dhe azere, për të cilat të dyja palët fajësojnë njëra-tjetrën. Këto konflikte shpërthyen të martën dhe përfunduan me ndërmjetësimin ndërkombëtar të enjten mbrëma. /tesheshi.com/
