Nga Mensur Krasniqi
Sa më shumë që afrohen zgjedhjet e parakohshme parlamentare, aq më shumë po nxehet debati mes analistësh dhe në opinionin e gjërë në Maqedoni.
Mirëpo ajo çka konsiderohet paradoksale është fenomeni që, shqiptarët, publikisht shfaqin një urrejtje massive dhe patologjike ndaj BDI-së së Ali Ahmetit, por fshehtësisht, pra kur votojnë, e lëshojnë votën pikërisht për këtë parti?!
Ose nga ana tjetër, nuk ndodh të dalë ndonjë militant i BDI-së e të deklarohet krenar me përzgjedhjen e tij politike?!
Pra, edhe ata që militojnë në radhët e kësaj partie, e kanë të kafshuar gjuhën për t’u shprehur krah saj, për ta promovuar si vlerë, për t’ja bërë me dije ndonjë arritje (nëse ka, kuptohet)…!
Atëherë parashtrohet pyetja kush në realitet po e voton BDI-në, dhe pse?!
Sipas opinionistit Burhan Seferi, sa i përket kritikuesve publik, që të njëjtët e votojnë të kritikuarin, ai sheh dy arsye: njëra janë kërcënimet direkte partiake ndaj trupit votues dhe e dyta korruptimi i tyre para zgjedhjeve me të holla, pasi që shumica e kritikuesve nuk janë të tillë që BDI-në e shohin si problem shoqëror, por si problem personal dhe egoist, atë ditë kur i jepet ashti, ndryshon politika.
“Makineria e manipulimit, vjedhjes dhe korruptimit të votuesve, janë faktorët kryesorë për mbajtjen në pushtet të një partie e cila i ka tejkaluar të gjitha kufijtë e dështimit. Një popull i varfër, shumë lehtë korruptohet dhe si i tillë, edhe lehtë manipulohet. Janë disa arsye kryesore që e mbajnë BDI-në në pushtet: vjedhja e votave, edhe atë në mënyre massive; korruptimi i qytetarëve me kushtëzime, kërcënime dhe të holla, propaganda e rrejshme mediatike, si dhe mospasja e një opsioni tjetër politik më të mirë se ata. Unë kam thënë disa herë se në opozitë me Mendu Thaçin, BDI-ja do të vazhdojë me fitore edhe njëzet vitet e ardhshme”, deklaroi për portalin tesheshi.com Burhan Seferi.
Ndërkaq, nga ana tjetër analisti politik Xhelal Neziri nuk është i mendimit që dikush do të kishte rrezikuar të kritikonte një parti publikisht, dhe po të njëjtën fshehurazi ta voton. Mirëpo sipas tij, fitoret bindëse BDI-së ua sjell struktura klienteliste që nuk votojnë platformën e tyre, por vendin e punës dhe interesat tjera personale që mund të nxjerrin nga partia.
,
“Të rrallë janë ata që publikisht kritikojnë një parti, por që fshehurazi e votojnë në ditën e zgjedhjeve. Zakonisht ndodh e kundërta. Por, fakti se fiton BDI ka lidhje me strukturën klienteliste që ka krijuar gjatë 14-viteve në pushtet. Kjo strukturë votuesish nuk voton për platformën e BDI-së, por për vendin e punës apo biznesin që kjo parti ka ka krijuar. Ata që janë të lirë të ktitikojnë nuk shohin një ofertë të konsoliduar politike, e cila do t’i motivonte dhe mobilizonte të dalin në votime. Pra, zakonisht abstenojnë. Me këtë i lënë hapësirë të zgjedhin fituesin vetëm asaj strukture të lidhur me partitë në pushtet nëpërmjet kanaleve të interesit konkret e praktik, siç është punësimi në administratë, tenderët, beneficionen nga pushtet e kështu me radhë”, u shpreh për tesheshi.com, Xhelal Neziri.
Rikujtojmë që zgjedhjet e parakohshme parlamentare sipas Marrëveshjes së Përzhinos, e nënshkruar nga 4 liderët e partive më të mëdha politike në Maqedoni, pritet të mbahen më 24 prill.
Tani mbetet të shohim nëse këto kritikues publik të BDI-së, do të bëhen “pishmanxhi”, dhe në moment të fundit t’ia besatojnë votën sërish të shumëkritikuarve. /tesheshi.com/
