Qeveria e Serbisë dhe strukturat paralele serbe që veprojnë në veri të Mitrovicës dhe Kosovës kanë filluar me rekrutimin e ri të pjesëtarëve të Civilna Zastitës, menjëherë pas proçesit të riintegrimit të 500 anëtarëve të saj në institucionet e Kosovës. Pra, e ashtëquajtura Mbrojtja Civile, e përbërë nga serbë të veriut, nuk do të shuhet, ashtu siç është rënë dakort në Bruksel, por ajo do ripërtërihet me tjetër kapital njerëzor.
Këtë informacion e përcolli për portalin tesheshi.com një burim kofidencial nga veriu. Sipas tij, rekrutimi ri i pjesëtarëve të ri i Civilna Zastitës për ta mbajtur këtë strukturë në këmbë dhe aktive, është duke u bërë pasi që veriu i Mitrovicës dhe i Kosovës, në një mënyrë ka mbetur vetëm në kontrollin e qeverisë së Kosovës, pra policisë; ndërsa strukturat paralele serbe dhe Beogradi dëshirojnë që veriun në tërësi ta mbajnë të kontrolluar edhe nga strukturat e tyre paralele.
“Më së shumti, pjesëtarë të rinj të Civilna Zastitës shihen duke hyrë dhe dalë në objektin e Komunës paralele serbe të veriut të Mitrovicës i cili gjendet në zonën e tre rrokaqiejve, në rrugën që të shpie për në fshatin Suhodoll”, ka specifikuar burimi dhe ka shtuar se aty shihen edhe makinat e tyre që janë të parkuar e që shfrytëzohen në raste emergjente që cilësohen nga strukturat paralele të Serbisë.
Burimi i portalit nuk ka mundur të specifikojë se sa anëtar të ri të kësaj organizate janë pranuar si dhe kush është emëruar komandant i ri i tyre.
Po ashtu, burimi i portalit ka shtuar se pas riintegrimit të rreth 500 pjesëtarëve të Civilna Zastitës në Institucionet e Kosovës, nuk dihet nëse këto të fundit kanë të dhëna se ku kanë mbetur uniformat e tyre, kujt i janë dorëzuar ato si dhe pajisjet për komunikim e makinat e shumta që i kanë shfrytëzuar këta pjesëtarë.
Në anën tjetër, zyrtarë të policisë së Kosovës në veri të Mitrovicës, kanë mohuar që të kenë njohuri lidhur me rekrutimin e ri të pjesëtarëve të Civilna Zastitës nga ana e strukturave paralele.
Zbatimi i marrëveshjes për riintegrimin e pjesëtarëve të Civilna Zastitës, tanimë ka filluar. Trajnimi i tyre është në përfundim e sipër, e për pak ditë pritet që këta zyrtarë, të fillojnë punë në shumë institucione të Kosovës.
“Në zbatim të Marrëveshjes së Brukselit për shuarjen e të ashtuquajturës “Mbrojtja Civile”, ose Civilna Zastita, të arritur më 26 mars 2015 me ndërmjetësimin e Bashkimit Evropian dhe mbështetjen e SHBA-ve, si dhe duke u mbështetur në vendimin e Qeverisë nr. 06/39 i datës 22.07.2015 për zbatimin e kësaj marrëveshjeje, është përmbyllur procesi i nënshkrimit të kontratave për individët që thuhet se me sukses janë përzgjedhur për t’u bërë pjesë e institucioneve të Republikës së Kosovës”. është thënë në një njoftim të lëshuar nga Qeveria e Kosovës kohë më parë. /tesheshi.com/
