Kryeministri Rama solli një tjetër thënie të Profetit Muhamed në “mirëmëngjesin” e tij komunikativ me publikun, një risi e ditëve post-tërmetore, të cilën vijon ta praktikojë rregullisht.
“Sillu sikur do rrish përgjithnjë në këtë botë dhe jeto çdo ditë sikur do vdesësh nesër”, (Paqja qoftë mbi të!)”, ka shkruar shefi i qeverisë shqiptare, ku veçojnë dhe fjalët në kllapa të cilat ai i lë në citimin e thënies. “Paqja qoftë mbi të”, është pjesë e pashkëputur e komunikimit tipik fetar mes bashkësisë muslimane, për çdo rast të përmendjes së emrit të profetit.
Ditë më parë, gjatë një fjalimi në parlament në mbrotje të ligjit “anti-shpifje”, Rama tha se kohët e fundit po lexonte ethshëm librat e shenjtë. E për rastin konkret, “anti-shpifjen”, ai dha të kuptuar se prej aty – Kur’anit – ai është ndikuar për të vlerësuar dinjitetin njerëzor mbi lirinë (e padisiplinuar) të fjalës. /tesheshi.com/
