Kabineti i kryeministrit grek Aleksis Cipras, që u njoftua prej tij mbrëmjen e së martës, përfshin në pjesën më të madhe emra të njohur nga administrata e mëparshme.
Rikthimi i figurave nga qeveria e mandatit të parë të Cipras reflekton, sipas analistëve, dëshirën për stabilitet ndërsa axhenda është e ngarkuar me menaxhimin e problemeve ekonomike.
Euclid Tsakalotos rikthehet si ministër i Financave, post që e ka mbajtur në muajt korrik-gusht pas largimit të Janis Varufakis.
Caktimi i tij sërish në këtë detyrë shihet si një garanci për kreditorët e Greqisë, pasi ishte Tsakalotos që negocioi me ta paketën e tretë të ndihmës prej 86 miliardë euro.
Bashkë me të, rikthehet në qeveri George Chouliarakis, që do të mbetet shefi negociator i Greqisë me kreditorët.
Ministrat e rinj betohen këtë të mërkurë, ndërsa Greqia ka formuar shpejt qeverinë pas zgjedhjeve të së dielës ku Syriza mori 35 për qind të votave e krijoi koalicion me Grekët e Pavarur.
Ministër i Emigracionit, një post i rëndësishëm ky për shkak të situatës me fluksin e refugjatëve në Greqi, ëstë caktuar Yiannis Mouzalas, anëtar i Mjekëve të Botës. Ai ka marrë pjesë në misione ndihme në të gjithë botën dhe kishte një post në qeverinë e përkohshme pas dorëheqjes së Cipras, në prag të zgjedhjeve.
Në krye të dikasterit të energjetikës mbetet Panos Skourletis ndërsa ka mbajtur të njëjtin post edhe George Stathakis si ministër pa portofol.
Lideri i Grekëve të Pavarur, Panos Kammenos, mban postin e ministrit të Mbrojtjes dhe një ish-komunist, si Nikos Kotzias ministrinë e Jashtme. /tesheshi.com/
