Paketa e re e reformave e kryeministrit Aleksis Cipras ka marrë miratimin e parlamentit, ndërsa shefat e Financave të eurozonës mblidhen në Bruksel për të vendosur nëse këto propozime janë të mjaftueshme për të siguruar paketën e tretë të ndihmës për Greqinë dhe shmangien e daljes së saj nga zona euro.
Gjithsesi, Cipras u përball me zemërim nga disa përfaqësues të partisë së tij për shkak se ka përfshirë në propozime masa që u refuzuan nga referendumi i mbajtur të dielën e kaluar.
Të dhënat e para flasin për një reagim pozitiv të kreditorëve ndaj planeve greke, por nuk ka asnjë siguri për ndihmën. Megjithatë, KE, BQE dhe FMN e cilësuan paketën e reformave si bazë për negociata.
Kryeministri pranoi përpara Parlamentit se paketa përfshin shumë propozime, që si tha ai, “janë larg zotimeve tona, larg nga ajo që unë ndjej se është e mirë për rimëkëmbjen e ekonomisë”. Ai tha se këto propozime janë vetëm pak më të përmirësuara nga ato të sjella prej kreditorëve muajin e kaluar.
Por, ai i tha Parlamentit se bëhet fjalë për një zgjedhje me rëndësi të madhe kombëtare. “Kemi për detyrë të mbajmë popullin tonë gjallë, ne do të arrijmë jo vetëm të qëndrojmë në eurozonë, por edhe të jetojmë të barabartë me dinjitet dhe krenari”.
Cipras kishte nevojë për mbështetjen e Opozitës për të fituar miratimin e paketës në parlament. Në total, 251 deputetë votuan “Po”, 32 votuan “Kundër” dhe tetë abstenuan.
Nëntë deputetë mungonin në sallë, mes të cilëve edhe ish-ministri i Financave, Janis Varufakis. /tesheshi/
