Javën e ardhshme organet e drejtësisë duhet të vendosin për lirimin e mundshëm të drejtorit dhe disidentit, i cili ndodhet në burg që nga korriku i vitit të kaluar.
Gjyqësori i Iranit duhet të vendosë javën e ardhshme për lirimin e mundshëm të drejtorit dhe disidentit Jafar Panahi, i cili ndodhet në burg që prej korrikut, tha avokati i tij pasi Gjykata e Lartë rrëzoi vendimin.
Panahi, 62 vjeç, është një nga regjisorët më të vlerësuar iranianë, raporton AFP.
Ai fitoi çmimin për skenarin më të mirë në vitin 2018 në Festivalin Ndërkombëtar të Filmit në Kanë, për realizimin e “Tre fytyrave”.
Në vitin 2015, ai mori çmimin për filmin më të mirë në Festivalin e Filmit në Berlin për filmin “Taksi Teheran”.
Në vitin 2010, artisti disident u dënua me 6 vjet burg dhe 20 vjet ndalim për regjinë dhe shkrimin e skenarëve të filmit, për udhëtime dhe për të folur në media, për “propagandë kundër regjimit“, sepse mbështeti lëvizjen protestuese kundër regjimit në vitin 2009.
Çështja e dorëzuar në Gjykatën e Apelit
Më pas ultrakonservatori Mahmud Ahmadinexhad u rizgjodh në zgjedhjet presidenciale në Iran.
“Autoritetet gjyqësore më kanë njoftuar se do të marrin një vendim për Panahin më së voni deri në fund të javës së ardhshme”, tha avokati Saleh Nikbakht, duke shtuar se vendimi u rrëzua më 15 tetor dhe Gjykata e Lartë e dërgoi çështjen në një tjetër gjykatë.
Avokati tha se këtë javë e gjithë çështja është dorëzuar në gjykatën e apelit dhe shtoi se sipas ligjit, Panahi duhet të lirohet menjëherë me kusht.
Sipas tij, Panahi ka pasur probleme shëndetësore edhe para arrestimit, ndërsa në burg është prekur nga një sëmundje e lëkurës. /tesheshi.com/
