Cilësohet “marifetçi”, vjen dënimi për Becchetti-n

Gjykata e Tiranës ka dhënë verdiktin për atë që nga shefi i qeverisë cilësohet si “marifetçi” me 17 vite burg. Fjala është për  Francesco Becchetti-n, i cili nga ana tjetër ka hedhur në gjyq arbitrazhi qeverinë “Rama”.

Italiani plot dritëhije u akuzua për pastrim parash dhe vjedhje duke shpërdoruar detyrën. Prokuroria kishte kërkuar 20 vite burg për këto akuza.

Sipas verdiktit të gjykatës, Becchetti ka krijuar një sistem shoqërish tregtare, me qëllim fshehjen e veprimtarisë kriminale. Në këtë sistem është përfshirë i pandehuri Becchetti, duke futur në këtë marrëdhënie nënën Lilliana Condomiti dhe vjehrrën e tij Vjollca Kamberi.

Sipas Gjykatës, asetet e tyre dhe llogaritë bankare të shoqërive do kalojnë në favor të shtetit.

Francesco Becchetti njihet si biznesmeni që do ndërtonte hidrocentralin e Kalivaçit, që nën qeverisjen Berisha, i cili është stopuar prej vitesh.

Më pas ai ndërtoi një televizion – Agon-in – me paga jashtë logjikës së tregut shqiptar mediatik, duke joshur e punësuar emra të njohur të ekranit.

Së fundi ka dalë në pah fakti se ai ende financon media në Shqipëri, siç është një television pranë opozitës, a më saktë pranë linjës “Berisha”. /tesheshi.com/