Cilat janë vendet më të palumtura në BE?

Gjermanët janë pothuajse qytetarët më të pakënaqur të BE-së: në një shkallë nga 0 deri në 10, ata e vlerësojnë kënaqësinë e përgjithshme me jetën me 6.5. Jua merr vetëm Bullgaria.

Pavarësisht pandemisë, krizave dhe luftërave, shumica e evropianëve janë ende shumë të kënaqur, sipas rezultateve të sondazhit të fundit të kryer në Bashkimin Evropian, i cili tashmë është publikuar nga Zyra Evropiane e Statistikave Eurostat.

Vlerësimi i publikuar tani bazohet në një sondazh të vitit 2022, në të cilin njerëzve në të gjithë Evropën iu kërkua të vlerësonin kënaqësinë e tyre me situatën e tyre të jetesës në një shkallë nga 0 deri në 10.

Banorët e BE-së e vlerësuan kënaqësinë e tyre nga jeta mesatarisht me 7.1 pikë. Në 18 nga 27 vendet e BE-së, kënaqësia nga jeta u vlerësua e njëjtë me mesataren e BE-së ose më e lartë.

Në të gjitha vendet, përveç Bullgarisë, e cila mori rezultatin më të keq, rezultatet mesatare të kënaqësisë nga jeta ishin mbi 6, që do të thotë se shumica e njerëzve në BE deklaruan se ishin më të kënaqur se sa të pakënaqur.

Nivelet e kënaqësisë u konverguan pak gjatë fazave të ndryshme të këtij sondazhi – ndoshta një shenjë se BE-ja po rritet në tërësi.

Gjermanët, gjithnjë e më shumë të pakënaqur

Në tre vendet e fundit janë Bullgaria (5.6), Gjermania (6.5) dhe Greqia (6.7). Në të njëjtën kohë, duhet theksuar se kënaqësia nga jeta në Greqi është rritur me 0,5 pikë gjatë dhjetë viteve të fundit. Në Bullgari, vlerësimi i kënaqësisë në vitin 2013 ishte vetëm 4.8 – pra kishte më shumë të pakënaqur sesa të kënaqur. Që atëherë, kjo vlerë është përmirësuar me 0.8 pikë, shkruan DW.

Nga ana tjetër, Gjermania është përkeqësuar ndjeshëm. Për gjermanët, kënaqësia nga jeta ra me 0.8 pikë – rënia më e madhe midis të gjitha vendeve të BE-së. Dhe në krye të më të kënaqurve është Zvicra me një vlerësim mesatar prej 8.0 – një vend që nuk është anëtar i BE-së, por shpesh shfaqet në studimet e Eurostat-it.

Austria (7.9) ka marrë pikën më të lartë në mesin e vendeve të BE-së. Finlanda, Polonia dhe Rumania pasojnë (7.7 secila), Belgjika dhe Holanda (të dyja 7.6). Qipriotët panë rritjen më të madhe të kënaqësisë në BE me një rritje prej 1.0 pikësh në 7.2.

Është për t’u habitur që në të gjitha vendet e BE-së njerëzit me një nivel arsimor më të lartë janë më të lumtur se ata me një nivel më të ulët. Ky ndryshim është më i madhi në Sllovaki (1.6 pikë mes personave pa shkollë dhe atyre me universitet), Rumani dhe Bullgari (1.5 pikë secili).

Përveç kësaj, në shumicën e vendeve të rinjtë (15-29 vjeç) janë më të kënaqur me jetën sesa të moshuarit e moshës 65 vjeç e lart; vetëm në Skandinavi, Irlandë, Holandë dhe Luksemburg është e kundërta. /tesheshi.com/