Nga Bashkim Kastrati
Zgjedhjet lokale të Kosovës që do të mbahen me 22 tetor të këtij viti priten të jenë interesante dhe sfiduese në disa komuna. Partitë politike kësaj here kanë zgjedhur shumë kandidatë të rinj që garojnë për herë të parë për të marrë postin e kryetarit në komunat përkatëse.
Në këtë zgjedhje për herë të parë pritet të ketë rivalitet të madh në dy komuna, të cilat që nga paslufta udhëhiqen nga Lidhja Demokratike e Kosovës (LDK). Është fjala për komunën e Fushë Kosovës dhe të Podujevës.
Të parën e udhëheq Burim Berisha, një aktivist i hershëm i LDK-së. Ai në të gjitha zgjedhjet ka marrë mbi 60 për qind të votave. Pra kjo komunë nuk ka shkuar asnjëherë në balotazh pasi fitorja e Berishës ka qenë e sigurt.
Por në këto zgjedhje Burim Berisha do ta ketë një rival serioz nga Lëvizja Vetëvendosje. Ai është Avni Zogiani, i cili pretendon ta marrë pushtetin në këtë komunë. Zogiani njihet si një person që gëzon popullaritet të madh. Ai ka qenë gazetar i luftës, është i shkolluar në Angli dhe Amerikë, ndërsa aktivitetin kryesor e ka zhvilluar në organizatën kundër korrupsionit ÇOHU!
Zogiani njihet si person i guximshëm që ka publikuar afera të ndryshme korruptive. Ai ka kritikuar shpesh edhe misionet ndërkombëtare në Kosovë, ndërsa nuk kanë munguar edhe përplasjet e tij me ambasadorë të fuqishëm në Kosovë, përfshirë edhe ish-ambasadorin e SHBA-ve Christofer Dell.
Zogiani në këtë garë ka marrë mbështetjen e plotë të elektoratit të LVV-së në Fushë Kosovë, ku është votuar si kandidati më i preferuar në zgjedhjet e brendshme të LVV-së.
Kujtojmë që në zgjedhjet e fundit LVV ka pasur rritje të theksuar në Fushë Kosovë dhe nëse kjo përkrahje do të jetë edhe në zgjedhjet e lokale, mund të ndodhë përmbysja në këtë komunë të vogël.
LDK në zgjedhjet e vitit 2010 ka marrë 4,512 vota, kurse në vitin 2014, ka marrë 4.518 vota ose 34,66%. Nga ana tjetër. Vetëvendosje në vitin 2010 ka 2,122 vota, ndërkaq në vitin 2014 ka marrë 2.236 vota ose 17,15%. Por, në zgjedhjet e qershorit ka marrë 4,877vota ose 34, 04 për qind, duke u renditur si subjekti i parë në këtë komunë. Pas saj është LDK me 4,612 vota ose 32,19 për qind.
Garë rivalizuese kësaj radhe pritet të zhvillohet edhe në Komunën e Podujevës, komunë kjo që konsiderohet si bastion e LDK-së. Agim Veliu, i cili njihet si person i fuqishëm edhe brenda kryesisë së LDK-së, në këto zgjedhje kërkon mandatin e pestë. Por kësaj radhe si duket do ta ketë më të vështirë.
LDK në vitet e fundit është rivalizuar nga PDK, ndërsa këtë rivalitet do ta rrisë edhe LVV, e cila ka pasur rritje të madhe në zgjedhjet e fundit. Kjo rritje i atribuohet aderimit në LVV të Ajet Poteres. Pikërisht Potera tani është mandatar për kryetar të Podujevës, prandaj gara do të jetë mjaft interesante. Ai k qenë njëri nga ish- komandantët më në zë të zonës së Llapit dhe para disa muajsh ka aderuar në Vetëvendosje pasi që braktisi Forcën e Sigurisë së Kosovës në të cilën shërbeu që nga themelimi, e paraprakisht edhe në Trupat Mbrojtëse të Kosovës.
Kandidat me ndikim në elektorat ka mandatar edhe PDK. Ai është Hajredin Hyseni. Edhe ky i fundit njihet si ish-luftëtar i zoti dhe që gëzon përkrahje të madhe në Podujevë.
Bazuar në rezultatin e zgjedhjeve nacionale të mbajtura në qershor të këtij viti, gara në këtë komunë do të jetë shumë e ngushtë. LDK ka pasur rënie të theksuar edhe pse është renditur e para me 13, 120 vota ose 39,59 për qind, e dyta është radhitur LVV me 10, 847 vota ose 32,73 për qind, që krahasuar me zgjedhjet e kaluara ka pasur rritje për 100 për qind. Ndërsa e treta është radhitur koalicionit PDK-AAK-NISMA me 8,303 vota, ose 25,06 për qind. /tesheshi.com/
