Nga Ermir Hoxha
Ish-kryeministri Berisha ka denoncuar si një anti-semit, atë që në një pjesë të popullsisë me sentimente të forta fetare, konsiderohet si vegël çifute, a ndryshe masone, Edi Ramën dora vetë. Referuar një fraze të tij në debatin parlamentar mbi votën shqiptare për Jerusalemin, ku opozita kërkoi që ajo të jetë pro-amerikane e ku Rama thotë se “ju jeni gati të bëheni çifute, jeni gati te beheni eskimezë, jeni gati të bëheni dele e zezë e këtij vendi…”, Berisha ka ndërtuar nëpërmjet kësaj akuzën që sipas tij e nxjerr Ramën një anti-hebre.
“Te dashur miq, sot Edvin Kristaq Rama riktheu pas dekadash ne parlament gjuhen e urrejtejes se eterve te tij mizor, Enver Hoxhes dhe klikes se tij ndaj hebrenjve. Neo-bllokmeni Edivin Kristaq Rama perdori sot ne parlament terminologjine tipike hoxhiste ndaj hebrenjve. Ai, ne nje shperthim urrejtje dhe perçmimi ndaj deputeteve te opozites por edhe kombit hebre, tha ne parlament se ‘ju jeni gati te beheni çifute, jeni gati te beheni eskimezë, jeni gati të bëheni dele e zezë e këtij vendi…’.
Kjo eshte nje fyerje antisemite tipike hoxhiste ndaj kombit hebre. Ky eshte nje akt tejet i rend dhe i papergjegjshem i nje njeriu qe ruan trashegimine dhe urrejtjen e eterve te tij ndaj nje kombi mik…”, shkruan ndër të tjera ish-lideri demokrat.
Por sa qëndron kjo?
Është e vërtetë që emërtesa çifut ka ngarkesë pezhorative, më së shumti nga konteksti social. Kur është fjala për njerëz të pandershëm në tregëti, është referimi si çifut e jo si hebre. Ndërkohë, përdorimi nga Rama ka tjetër kontekst, pasi ai adresimin e ka në tjetër çështje: tek stili i të bërit politikë nga opozita. Mjaft fakti që ajo që vjen pas çifutit në frazë, eskimezë, nuk ka asnjë përmbajtje pezhorative dhe është adresim i kulluar etnik. Në një mënyra e tjetër, ndodh që dhe grekët të ndihen të fyer kur atyre iu adresohesh si grekë, ngase parapëlqejnë të thirren si helenë. Edhe në rastin shqiptar, kemi precedentin gjuhësor arnaut, që na duket si një baltosje e identitetit nacional, mu për shkak të ngarkesës pezhorative që ka marrë në kohë.
Por nga ana tjetër, është vetë Berisha që së fundi ka përfshirë në fjalorin e tij polemizues me Ramën, fjalën synetllëk.
“Do të them një gjë, shpreh vlerësimin e madh për Turqinë dhe presidentin e saj por nuk pajtohem kurrë me presidentin e saj kur thotë se Kosova nuk u bë shtet. Njeriu që…. Ore shko bëhu synet ti atje, unë jam Sali Berisha. Je gabim ti, shko bëhu synet atje.Unë i kam publike qëndrimet e mia, nuk mund të pajtohem kurrë me deklaratën e tij. Kur i erdhi çështja kurde tani duhej lëshuar Kosova”, deklaroi ish-kreu demokrat së fundi.
Kjo fjalë po ashtu, padrejtësisht ka marrë një ngarkesë në mos pezhorative, paksa arkaike, deri përtallëse, sidomos për ata që e aplikojnë si rit. Ngacmimin e ka nga fakti se është fjala për një ndërhyrjeje të lehtë kirurgjikale në organin mashkullor, konsideruar si etikë fetare si në Hebraizëm e si në Islam. Për këto dy bashkësi fetare, aty jo vetëm që nuk ka asgjë qesharake por çështja është shumë serioze. Sepse, referuar arsyeve shëndetësore, njeriu është mbrojtur nga shumë sëmundje me anë të synetllëkut, që nuk ka asnjë lidhje me tredhjen, siç mund ta keqkuptojë dikush. Burri është dhe mbetet burrë edhe i bërë synet, madje me më shumë shanse për të qenë i tillë në terma seksualë, sa të ketë jetën. Ndërsa Berisha, e merr synetllëkun dhe pa u merakosur për “shenjtërinë” e tij, e konverton në një thagmë ironike në polemikën politike. Ka ndodhur dy herë kjo kohët e fundit, kur me anë të synetllëkut, Berisha ka dashur të damkosë Ramën për aleancën e tij me Erdoganin. Mirëpo ngarkesa që ka marrë termi në fjalë, sipas mënyrës së përdorur, është po aq fyese për një komunitet që e ka synetllëkun çështje serioze.
Madje dhe turqit, gjithashtu dhe politika e Ankarasë, me të drejtë mund të ndihet e fyer, pasi vendi i tyre identifikohet kështu vetëm me një xherah që operon mbi një palë allate.
Si të thuash, deri diku e njëjta gjë që pretendon Berisha kur ngre akuzë ndaj Ramës për përdorimin e fjalës çifut. /tesheshi.com/
