Nga Mensur Krasniqi
Kriza politike në Maqedoni, është pasqyruar së fundmi edhe nga Foreign Office britanik, prej së cilit janë lëshuar disa rekomandime për shtetasit nga ky vend që mund ta vizitojnë shtetin ballkanik me afrimin e sezonit turistik. Në një raport vlerësohet se Maqedonia është vend me rrezik të përgjithshëm nga terrorizmi, ndërsa problem shtesë janë migrantët, protesta, mungesa e ilaçeve, etj.
“Ka protesta në qendër të Shkupit dhe në vende tjera për shkak krizës politike. Protestat mund të ndodhin edhe pa paralajmërim, ndërsa në moment janë të dhunshme. Mundësia për protesta të mëtutjeshme në periudhën deri më 5 qershor kur janë caktuar zgjedhjet është e lartë. Kontrolloni mediat lokale dhe shmangni çdolloj protesta ose tubime të mëdha”, u rekomandon Foreing Office qytetarëve britanik.
Në lidhje me migrantët thuhet se autoritetet në Maqedoni kanë shpallur zona të krizës rajonet në kufirin verior dhe jugor.
“Shmangni grupe të mëdha dhe jeni të vetëdijshëm se trenat që hyjnë në Maqedoni nga Greqia mund të anulohen, nëse ka problem në kufirin Greqi- Maqedoni. Shumica e vizitave në Maqedoni kalojnë pa problem. Ndonjëherë ndodhin akte të dhunës kriminele, por të huajt zakonisht nuk janë qëllimi i tyre”, thuhet më tej njoftim.
Por sipas Foreing Office, ekziston kërcënim i përgjithshëm në vend edhe nga terrorizmi. “Sulmet – thuhet në njoftim – mund të jenë jo veçuese, që do të thotë mund të ndodhin edhe në vende ku qëndrojnë të huajt.” Nuk dihet se pse është futur dhe rreziku nga terrorizmi në raport, ndërkohë që Maqedonia deri më tani nuk ka asnjë të dhënë për rreziqe të tilla potenciale.
Por sa i përket situatës politike, ajo sigurisht që është e trazuar, deri në rrezik destabiliteti si pasojë e frymës së përgjithshme protestuese ndaj qeverisë.
Por sa do ndikojë kjo në turizmin e këtij sezoni?
Të shqetësuar me situatën politike në Maqedoni së fundi janë treguar edhe agjencitë turistike, e në veçanti ciceronët. Si pasojë e tensioneve dhe protestave të dhunshme, po edhe duke dashur që të evitojnë çfarëdo rreziku për turistët, ciceronët shpesh herë detyrohen ta ndryshojnë agjendën e prezantimit të vendeve dhe monumenteve historike të një pjese të Shkupit.
“Për momentin situata në Maqedoni, gjegjësisht në Shkup nuk është e sigurt për vet ne si qytetar, e ku mbeti për turistët. Si agjencitë, por edhe ne ciceronët ndjehemi të shqetësuar. Për agjencitë është problem sepse ndodh që të shënohet ulje drastike e interesit të turistëve për të realizuar aventurën turistike në Maqedoni, ndërsa për ne si ciceronë na vështirëson me vet faktin që për çdo ditë në pjesët më të pasura me monumente historike si Qendra e Shkupit, Çarshia e Vjetër, apo Kalaja, qytetarët shprehin revoltën e tyre ndaj pushtetit të korruptuar nëpërmjet protestave, duke mos kursyer as përdorimin e dhunës”, deklaroi për portalin tesheshi.com, ciceroni shkupjan Talha Ali.
Po ashtu, ciceroni sqaron se turistët që vijnë në Maqedoni janë mjaft kurreshtar për të mësuar arsyet se pse ndodhin këto trazira në një shtet kaq të vogël si Maqedonia. Andaj, në vend se të flitet për veçoritë pozitive që e karakterizojnë Maqedoninë, ata duhet të luajnë rolin e një analisti politik.
“Është interesante meqë turistët shpesh dijnë të parashtrojnë pyetje që për nga natyra nuk na takojnë aq shumë të flasim ne si ciceronë, ama ajo është e vërteta në Maqedoni bën çka bën politika nuk të ik asnjëherë. Kështu pra ndodh të kalon një ditë e plotë duke u marr vetëm me situatën politike në Maqedoni”, përfundon ciceroni Talha Ali. /tesheshi.com/
