Donald Lu, edhe pse në fillim të korrikut thirri politikanët në një festë të madhe me rastin e pavarësisë së SHBA dhe shpalli largimin e tij në detyrën e re si ambasador në Kirgistan, duket se realisht nuk është larguar ende.
Ndërsa një pjesë e madhe e politikës shqiptare shprehën një çlirim në rrjete sociale për ikjen e diplomatit që bëri armiq elitën e politikës së vjetër, atyre duket se iu është ngrirë buzëqeshja në buzë.
Agjencia Inteligjente e SHBA-së, CIA, më 16 gusht ka publikuar Factbook-un e ri, apo hartën e informacioneve zyrtare mbi çdo shtet të botës, në faqen e saj të internetit.
Në ballinën e faqes së saj të internetit, CIA bën të ditur se Factbook-u i ri është përditësuar me informacione të reja mbi gjendjen politike, ekonomike e gjeopolitike të çdo shtetit.
Ajo që bie në sy në faqen për Shqipërinë, është se kur flitet për misionin diplomatik të SHBA-së në Tiranë, shkruhet e bardhë në të zezë se Donald Lu është ambasador në Shqipëri.
Ka shumë gjasa që gjithçka të mos jetë një lapsus redaktimi, por një informacion i tërhequr nga Departamenti i Shtetit.
Edhe pse Presidenti Trump ka emëruar si ambasadore në Tiranë, diplomaten Kathlyn Kavalec, kjo e fundit ende nuk ka marrë konfirmimin nga Senati i SHBA-së, madje as nuk është paraqitur në seancën e së premtes kur në Komisionin e Jashtëm ishin të emëruarit ambasadorë në vendet e Ballkanit.
Kavalec është pjesë e një hetimi parlamentar nga disa senatorë republikanë, që akuzojnë disa zyrtarë të DASH se kanë hartuar një dosje kundër Donald Trump në lidhje me Russia Gate.
Nuk dihet ende nëse do të kthehet vendimin për emërimin e Kavalec si ambasadore në Tiranë, apo ajo do të vijojë normalisht procedurat parlamentare.
Por edhe nëse ndodh kështu, ka gjasa që gjithçka të bëhet rreth vjeshtës së vonë.
Deri atëherë, sipas gjasave, në “Rrugën e Elbasanit” do të qëndrojë “Donaldi nr. 2”, siç e quajnë kritikët e tij, dhe siç CIA e vë në pah në Factbook-un e saj të ri.
Një lajm që pritet të sjellë reagime të mëdha nga ajo pjesë e politikës që nuk e ka honepsur Donald Lu-në, pas marrjes së pozicionit të fortë nga ai për reformën në drejtësi.
Lu-ja është ambasadori më i sulmuar prej dy lobimeve të forta politike në vend, atij ë ish-kryeministrit Sali Berisha dhe të Presidentit Ilir Meta.
Pritet që këto ditë, në lidhje me çështjen e emërimit të ambasadores së re të ketë edhe një qëndrim të Departamentit të Shtetit, por Factbook-u i CIA-as është gjithashtu një dokument që duket do të nxisë polemika të forta këto ditë të heshtura të politikës shqiptare… /tesheshi.com/
