Marrëveshja historike e pranuar nga Bashkimi Evropian për ndarjen e 750 miliardë eurove për të ndihmuar ekonomitë më të dobëta të Unionit për t’u rikuperuar nga pandemia e virusit koronar, “mund të kishte qenë më mirë”, tha presidentja e Bankës Qendrore Evropiane, Christine Lagarde.
Sipas marrëveshjes, të miratuar të martën pas bisedimeve të vështira, Komisioni Evropian duhet të disbursojë 390 miliardë subvencione dhe 360 në kredi të favorshme për vendet anëtare, sipas kritereve që përfshijnë shkallën e papunësisë në vitet e fundit, dhe më vonë edhe dëmin ekonomik të shkaktuar nga pandemia.
Por Lagarde është një kritike e rrallë e marrëveshjes, duke thënë se ajo do të ishte më e lumtur me më shumë subvencione në vend të huave, sipas propozimit origjinal të Komisionit, i cili u ndryshua për të bindur vendet e kursyera fiskalisht si Hollanda, njoftoi Reuters.
“Mund të ishte më mirë, por ishte një projekt shumë ambicioz,” tha Lagarde në një intervistë për Washington Post.
Gjatë fundjavës, Lagarde tha që drejtuesit e BE-së duhet të bien dakord për një paketë që është në përputhje me propozimin e Komisionit, i cili ishte për të siguruar 500 miliardë euro në subvencione, megjithëse do të duhej më shumë kohë për të arritur një marrëveshje.
Ministri i Jashtëm gjerman e krahasoi marrëveshjen me vendimin e Alexander Hamilton, një prej baballarëve themelues amerikanë, për të federalizuar borxhet e shteteve amerikane në 1790. /tesheshi.com/
