Cherie Blair, bashkëshortja e ishkryeministrit Britanik dhe këshilltarit të qeverisë Rama, Tony Blair, do të vizitojë nesër Tiranën, ku do të marrë pjesë në një aktivitet të organizuar nga MInistria e Mirëqenies Sociale dhe Rinisë.
Vizita e saj në kryqytetin shqiptar vjen vetëm pak ditë pas lajmit për fitimin e një kontrate për të përfaqësuar qeverinë shqiptare në një çështje arbitrazhi. Ky lajm hapi shumë polemika në mediat shqiptare, duke e lidhur çështjen me një konflikt të mundshëm interesi meqë bëhet fjalë për një qeveri ku i shoqi është këshilltar.
Por në fakt zonja Blair nuk e ka për herë të parë mbrojtjen e shqiptarëve në gjykatat më prestigjoze ndërkombëtare. Një të tillë e për çështje arbitrazhi e ka bërë me qeverinë e shkuar që drejtohej nga Sali Berisha. Por rasti më i bujshëm është mbrojtja në Hagë e Ramush Haradinajt, ish-kryeministrit të Kosovës dhe kreut të Aleancës për Ardhmërinë e Kosovës, i cili u shpall i pafajshëm nga gjykata Ndërkombëtare e Krimeve të Luftës.
Studioja ligjore ku zonja Blair është ortake, përkatësisht Matrix Law së bashku me vetë zotin Haradinaj u pajtua edhe nga qeveria shqiptare e asaj kohe nëpërmjet ambasadës sonë në Mbretërinë e Bashkuar për shërbyer si mbrojtëse e ish-kryeministrit të Kosovës. Më 29 Nëntor 2012 Haradinaj u shpall i pafajshëm për krime lufte.
Matrix është një studio ligjore ku marrin pjesë shumë avokatë dhe merret me çështje penale civile dhe të ligjit ndërkombëtar.
Anëtarët e kësaj studioje janë: Cherie Booth(Blair) QC, Daniel Brennan, Baron Brennan QC, James Crawford (jurist) SC, Ben Emmerson QC, Conor Gearty, Sir Ken Macdonald QC, Baron Macdonald of River Glaven, Clare Montgomery QC, Julian B. Knoëles QC, Tim Oëen QC, Philippe Sands QC, Hugh Tomlinson QC.
Cherie Blair është ftuar nga ministria e Mirëqënies Sociale dhe Rinisë për të referuar në aktivitetin me temën “Rritja e rolit drejtues të grave në jetën politike, publike, në media e biznes – Fuqizim i gjithë shoqërisë”. Në këtë bashkëbisedim janë të ftuara te marrin pjesë gra të cilat kanë një kontribut të rëndësishëm në jetën politike e publike në fushën e biznesit dhe të medias, duke evidentuar se rritja e rolit drejtues të grave është një shtysë për fuqizimin e gjithë shoqërisë.
(tesheshi.com)
