Së fundmi, përveç jahteve shumë milionëshe në pronësi të manjatëve rusë, autoritetet evropiane kanë vënë në shënjestër edhe pronat luksoze që ata menaxhojnë.
Pas qeverisë britanike, edhe autoritetet franceze proceduan me ngrirjen e aseteve me vlerë mbi gjysmë miliardë euro në vend. Deri më tani, në fakt, Franca ka njoftuar se gjithsej 30 prona në pronësi të biznesmenëve rusë nuk mund të shiten apo të jepen më me qira.
Shumica ndodhen pranë Kanës, konkretisht në Cap d’Antibes, “gjiri i miliarderëve”.
Këto janë disa nga pronat që janë vënë në shënjestër nga qeveria franceze
Château de la Croë
E ndërtuar në një sipërfaqe prej 18 hektarësh, kështjella me kopsht në çati dhe pishinë ndodhet në buzë të Cap d’Antibes. Rreth dy dekada më parë, ajo kaloi në duart e oligarkut rus Roman Abramovich.
E ndërtuar në fund të viteve 1920 për llogari të një manjati të shtypit, rezidenca e stilit viktorian ishte më parë një rezidencë mbretërore. Mbreti Eduard VIII u zhvendos në Château de la Croë menjëherë pas dorëheqjes së tij të diskutueshme në 1937 për t’u martuar me socialisten amerikane Wallis Simpson. Në vitet 1950, prona ishte në pronësi të Aristotle Onassis dhe më vonë kaloi në duart e Stavros Niarchos.
Megjithatë, disa vite më vonë, në vitet 1970, një zjarr i madh shpërtheu në ndërtesë, duke e lënë atë të braktisur prej vitesh. Kur Abramovich e bleu, ai shpenzoi më shumë se 150 milionë euro për ta rinovuar.
Vila Hier
Miliarderi rus Suleiman Kerimov ka qenë i lidhur me pronën në Cap d’Antibes. Rezidenca përfshin një fushë tenisi, si dhe një pishinë të madhe. Autoritetet franceze deklaruan se rezidenca u ble për 127 milionë euro në vitin 2008.
Villa Altaïr
Sipas Forbes, në këtë pronë, manjati Andrei Melnichenko organizoi dasmën e tij luksoze në të cilën kënduan Whitney Houston dhe Christina Aguilera. Andrei Melnichenko gjithashtu zotëron dy superjahte. Njëri – jahti më i madh me vela në botë – u konfiskua së fundmi nga autoritetet italiane në Trieste, ndërsa tjetri aktualisht ndodhet në Seychelles. Sipas Bloomberg, Andrei Melnichenko thuhet se zotëron 100% të aksioneve në kompaninë përmes së cilës është blerë prona.
La Chabanne dhe Lusetto
Oligarku rus Alexander Ponomarenko i bleu dy vilat ngjitur në vitin 2008 për 83.5 milionë euro.
Vila Nellcôte
Shtëpia u bë e famshme kur Rolling Stones regjistruan albumin e tyre Exile On Main St. në vitet 1970, shumë përpara se ta merrte manjati Viktor Rasnikov. Presidenti i Magnitogorsk Iron & Steel Works thuhet se bleu rezidencën Belle Epoque në 2007 për 83 milionë euro.
La Petite Ourse
Vila i përket Alexei Kuzmichev, një prej themeluesve të Alfa Group. /tesheshi.com/
