Revista satirike franceze Charlie Hebdo nuk njeh caqe në zgjedhjen e viktimave të saj. E specializuar në përzgjedhjen e gjërave më të ndjeshme për publikun, ajo nuk lë gjithashtu tragjedi njerëzore pa e bërë pjesë të satirës së vet.
E vënë me shpatulla pas muri mbas kuturisjes muaj të shkuar për të karikaturizuar një fëmijë sirian, zhurmëmadhja Charlie Hebdo e ka gjetur me vend ta shndërrojë në karikaturë tragjedinë e fundjavës së shkuar, kur një avion i një kompanie ruse u rrëzua në hapësirën egjiptiane, e për pasojë humbën jetën të 224 pasagjerët që po udhëtonin me të.
“Sakrilegj” e ka quajtur dje zëdhënësi i Vladimir Putinit të pabërën e radhës të Charlie Hebdo-së.
“Ne mund ta përmbledhim këtë me një fjalë të vetme: sakrilegj,” u tha gazetarëve Dmitry Peskov.
Ai i quajti të papranueshme karikaturat, duke theksuar se e tëra kjo nuk ka të bëjë aspak me demokracinë apo me shprehjen e lirë.
“Nuk është satirë, por tallje e ndyrë,” deklaroi tërë zemërim nënkryetari i Dumës ruse, Ivan Melnikov, ndërsa Twitter-i në gjuhën ruse u mbush me shprehjen, “Unë nuk jam Charlie”.
Në njërën karikaturë vihen në lojë bombardimet e Rusisë në Siri dhe efikasiteti i tyre i munguar. 
Karikatura paraqet pjesë të avionit dhe trupa njerëzorë që bien mbi kokën e një militanti të ISIS-it, shoqëruar me fjalët, “ISIS: Aviacioni rus po intensifikon bombardimet”.
Karikaturën tjetër e përshkojnë fjalët: “Rreziqet e linjave ajrore ruse me kosto të ulët.”
Filozofia e Charlie Hebdo-së për ngacmimin deri në dhimbje të sentimenteve njerëzore zgjodhi këtë herë si shënjestër të saj rrëzimin e avionit të kompanisë ruse. Kush e ka radhën? Vetëm Charlie Hebdo e di! /tesheshi.com/
