Në Kardif luhet këtë mbrëmje akti i fundit i futbollit europian për klube. Në Kardif do të zbresë në fushë avangarda e futbollit europian: në njërën anë Juventusi, në kërkim të lavdisë dhe në kontinent pas dominimit total në Serinë A, në anën tjetër Reali i Madridit, mjeshtri i Champions League-s, fitues si asnjë skuadër tjetër në këtë aktivitet.
Reali i Madridit është fituesi i sezonit të fundit në veprimtarinë më me prestigj në Europë për klube; Juventus kthehet të luajë në finale pas dy vitesh, pasi pati humbur në 2015-n ndaj një tjetër gjigandi spanjoll, Barcelonës.
Përndryshe, ndeshja e kësaj të shtune është dhe një përsëritje e finales së 1998-s, kur Reali fitonte ngushtësisht, mjaftueshëm për ta marrë trofeun.
“Ka për të qenë një ndeshje magjepsëse. Reali është favorit. Do të japim gjithçka për ta marrë trofeun. Vijmë në Kardif për ta fituar Champions League-n, e kjo është ajo çka duhet të bëjmë. Duhet të zbresim në fushë tërë besim se ne do ta fitojmë atë,” deklaron Massimiliano Allegri para kësaj finaleje.
“Ata thonë se ne jemi favoritë, por futbolli nuk është kështu. Eshtë një finale, dhe gjithçka mund të ndodhë në një ndeshje futbolli. Ne nuk jemi favoritë, as është Juventusi. Eshtë 50 me 50. E rëndësishme është të japim gjithçka. Çfarë unë dua, çfarë ne të gjithë duam, është të shohim një finale të madhe,” thotë Zinedine Zidane.
Për francezin duhet të ketë emocione të përziera. Në finalen e 20 majit të 1998-s, ai ishte në fushë si një lojtar i Juventusit, e thuajse dy dekada më vonë gjendet në po në një finale të tillë në stolin e Realit, si trajner i tij!
E përditshmja spanjolle Marca jep këto formacione të mundshme për finalen e 3 qershorit.
Juventusi: Buffon, Alves, Barzagli, Bonucci, Chiellini, Alex Sandro, Khedira, Pjanic, Mandzukic, Dybala, Higuain.
Reali i Madridit: Navas, Carvajal, Ramos, Varane, Marcelo, Casemiro, Kroos, Modric, Isco, Ronaldo, Benzema. /tesheshi.com/
