Champions League kthehet me ndeshjet e dyta të fazës në grupe. Tetë takime do të luhen këtë mbrëmje, e po kaq sfida presin ditën e nesërme për t’u zhvilluar.
Sonte përplasen skuadrat e grupeve E, F, G dhe H, ndërsa përballja kryesore është ajo mes Borusias së Dortmundit dhe Realit të Madridit.
Skuadra gjermane vjen pas fitores së thellë në Poloni thuajse dy javë të shkuara. Rezultati 0-6 ndaj Legias së Varshavës tregon për forcën dhe formën jashtëzakonisht të mirë të Borusias. Gjermanët kanë fituar dhe në Bundesligë në fundjavë ndaj Frajburgut.
Reali i Madridit do të fitonte në çastet e fundit në atë ndeshje të parë ndaj Sportingut të Lisbonës. Frenimi në kampionatin spanjoll ndaj Las Palmasit, dhe prishja e qetësisë pas këtij takimi me fërkimet midis Ronaldo-s dhe trajnerit Zinedine Zidane, e bëjnë pak më të brishtë atmosferën te madrilenët.
Veç këtij takimi, ora 20:45 do të na ofrojë sonte dhe sfidat:
Monako – Bajer Leverkusen
CSKA e Moskës – Totenhem
Sporting i Lisbonës – Legia e Varshavës
Kopenhagen – Bryzh
Lestër Siti – Porto
Sevilja – Lion
Dinamo e Zagrebit – Juventus
/tesheshi.com/
