Mbrëmë janë luajtur pesë ndeshjet e fundit të play-off-it në Champions League, ku rezultati më befasues ka qenë eliminimi i Ajaksit të Amsterdamit, të mundur thellë nga rusët e Rostovit.
Takimi i parë në Holandë ishte mbyllur në barazim 1-1, por rusët tregohen të papërmbajtshëm në vendin e tyre. Rostov fitoi 4-1 ndaj Ajaksit, duke u kualifikuar për në fazën në grupe të Champions League-s.
Azmoun, Erokhin, Noboa dhe Poloz ishin shënuesit e golave për rusët, kurse goli i nderit pët holandezët u realizua nga Klaassen gjashtë minuta para mbarimit të lojës me 11-metërsh.
Borusia e Mynshegladbahut i shkatërroi zvicerianët e Jang Bojsit, duke fituar 6-1. Kualifikimi i gjermanëve ishte thuajse i arritur, teksa ata e kishin fituar takimin e parë 1-3. Fitorja e Borusias ishte rezultati më i thellë i takimeve të play-off-it të Champions League-s.
APOEL – Kopenhagen u mbyll 1-1, me danezët që kalojnë në fazën në grupe. Fitorja 1-0 në sfidën e parë ua jep këtë mundësi.
Mançester Siti u mjaftua me një fitore 1-0 ndaj Steauasë së Bukureshtit, e qetë pas fitores 0-5 një javë më parë. Guardiola i kishte lënë në stol një numër lojtarësh të ekipit të parë, mes të cilëve Aguero-n. Në portë qe zgjedhur të luante Hart, që mbase pati ndeshjen e fundit me Mançester Sitin. Humbja e vendit në formacion e ka detyruar portierin e kombëtares angleze të kërkojë një skuadër tjetër.
Dinamo e Zagrebit po ashtu ka siguruar një vend në fazën në grupe të Champions League-s. Në Zagreb do të mbyllej në barazim përballja me Salcburgun. Po 1-1 do të përfundonin 90 minutat në “Red Bull Arena”. Goli i Soudani-t në shtesa, në minutën e 95-të, do t’u jepte fitoren 1-2 kroatëve, që iu gëzuan kualifikimit.
Kështu, dhjetë skuadrat e kualifikuar në play-off janë Kopenhageni, Dinamo e Zagrebit, Mançester Siti, Rostovi, Borusia e Mynshegladbahut, Ludogoreci, Sëlltiku, Legia e Varshavës, Porto dhe Monako. /tesheshi.com/
