Në nëntë takimet e Champions League-s, të luajtura mbrëmjen e së mërkurës, nuk kanë munguar golat e shumtë e fitoret e thella.
Pas Barcelonës, e ka patur radhën Borusia e Dortmundit të regjistrojë një fitore të përmasave të mëdha. Në Varshavë, ndaj Legias së mirënjohur, të drejtuar nga Besnik Hasi, pikëpyetjet janë shuar shumë shpejt, pasi në pak më tepër se çerekorëshin e parë të lojës rezultati ka qenë 0-3. Borusia do t’i dyfishonte shifrat më pjesën e dytë, për të regjistruar fitoren më të thellë të saj në Europë.
E shtyrë për shkak të shirave, Mançester Siti – Borusia e Mynshegladbahut është luajtur të mërkurën. Në “Etihad Stadium” ka patur një protagonist: Sergio Aguero. Tre gola ka shënuar argjentinasi në fitoren e pastër të Mançesterit, që vijon me serinë e rezultateve pozitive që në nisje të sezonit.
Lestër Siti ka debutuar me një fitore bindëse në Belgjikë ndaj Bryzhit. Një të tillë fitore ka patur dhe për Olimpikun e Lionit ndaj Dinamos së Zagrebit.
Tërheqës ka qenë takimi në “Santiago Bernabeu” midis Realit të Madridit dhe Sportingut të Lisbonës. Portugezët kanë bërë një paraqitje mjaft të mirë, duke kryesuar deri në minutën e 89-të. Një goditje dënimi e ekzekutuar mjeshtërisht nga Ronaldo dhe një krosim i kthyer në gol nga goditja me kokë e Morata-s kanë bërë që në minutat e fundit fitorja të kalojë në anën e vendasve.
I papritur barazimi i Juventusit ndaj Seviljes, e për më tepër, pa gola. Ka qenë e vetmja 0-0 e mbrëmjes, e fiksuar në një ndeshje që nuk pritej të kishte fund të tillë.
Një fitore të çmuar ka arritur dhe Monako në Londër ndaj Totenhemit.
Të nëntë takimet janë mbyllur kësisoj:
Mançester Siti – Borusia e Mynshegladbahut 4-0
Bajer Leverkusen – CSKA e Moskës 2-2
Totenhem – Monako 1-2
Real i Madridit – Sporting i Lisbonës 2-1
Legia e Varshavës – Borusia e Dortmundit 0-6
Bryzh – Lestër Siti 0-3
Porto – Kopenhagen 1-1
Lion – Dinamo e Zagrebit 3-0
Juventus – Sevilja 0-0
/tesheshi.com/
