Pas incidentit të mbrëmjes të së martës, anulimit të ndeshjes, për Borusian e Dortmundit nuk shkon mirë as sonte.
Në “Signal Iduna Park” fitues janë francezët e Monakos, që bëjnë një hap përpara drejt gjysmëfinaleve të Champions League-s.
Çerekfinalja e parë mes Borusias së Dortmundit e Monakos është mbyllur 2-3, me dy paraqitje të ndryshme të vendasve në dy pjesët e lojës.
Një pjesë e parë krejtësisht e mjegullt për lojtarët e Dortmundit, çka paguhet me dy gola për Monakon. Së pari është Fabinho që humb një 11-metërsh pas një ekzekutimi mediokër; një gabim i ndrequr nga Mbappe vetëm dy minuta më vonë. Dhjetë minuta para përfundimit të kësaj pjese vjen dhe autogoli i Bender-it.
Një Borusia krejt tjetër në 45 minutat e dyta. Dembele shkurton shifrat pas një presioni të gjatë. Dhe kur pritej barazimi, Mbappe shënon golin e tretë për Monakon. Kagawa lë gjurmë me golin e minutës së 84-t, duke e çuar rezultatin në 2-3.
Rezultat që nuk ndryshon më, e që i lë të hidhëruar vendasit. Megjithatë, asgjë nuk ka mbaruar. Vetëm pas një jave do të jetë ndeshja e kthimit, ku mund të ndodhë gjithçka. /tesheshi.com/
