Nga Ylli Pata
Shpërthimi në Prishtinë i çështjes së pezullimit të Gjykatës Speciale që alarmoi SHBA-në dhe aleatët e tjerë perëndimorë, nuk duket se ka ndodhur rastësisht.
Drafti i një grupi deputetësh që tregoi se ekziston mundësia për ta ç’bërë institucionin që do të dënojë vetëm pjesëtarë të UÇK-së, është paraqitur pikërisht pasi presidenti serb, Aleksandër Vuçiç i kërkoi zyrtarisht Moskës që të jetë pjesë e dialogut Prishtinë-Beograd.
Pikërisht kjo tezë kundërshtohet fuqishëm si nga BE-ja, që është aktorja kryesore e bisedimeve mes Serbisë dhe Kosovës, por edhe nga SHBA-ja, të cilat nuk e duan Moskën si pjesë e kuzhinës ku gatuhen planet në Ballkan.
Jo më kot, menjëherë pas deklaratës së Vuçiç, Hoyt Brian Yee, nga Athina i përsëriti Beogradit ultimatumin se nuk mund të rrijë edhe në karrigen e BE-së edhe në atë të Rusisë.
Mirëpo pas ultimatumit të zyrtarit të DASH, Vuçiç tha se ndërhyrja e Rusisë si palë e tretë do të ndodhë nëse shpërthen një konflikt.
“Do të ndryshojë formati i dialogut Serbi-Kosovë, nëse do të ketë ndonjë situatë konfliktuale”, deklaroi presidenti serb, duke shtuar se Prishtina ka kërkuar SHBA-në në dialog.
Hyrja e Rusisë në lojrat vendimarrëse të Ballkanit u ndaluan me “dhunë” nga Uashingtoni, pikërisht kur ndodhi dhuna në Parlamentin e Maqedonisë, më 27 prill.
Për të koordinuar punët që të ndalojë Moskën, SHBA ka vendosur që ambasadën në Shkup ta ketë si një qendër të madhe të saj për Ballkanin, njësoj si qendra ruse e Nishit, por këtë herë në krahun e kundërt.
Në krye të kësaj ambasade pritet të emërohet “buldozeri” Hoyt Brian Yee, i cili e njeh shumë mirë edhe personalisht forcën dhe mundësinë e Moskës.
Ndërkaq, pikërisht kur në Prishtinë shpërtheu “kriza e Speciales”, Aleksandër Vuçiç urdhëroi ministrin e tij të Mbrojtjes që të deklarojë me forcë që “Beogradi duhet të ndërpresë menjëherë dialogun me Prishtinën”.
Nëse ndodh kjo ndërprerje, atëherë ka shumë gjasa që në OKB të kërkohet një riaktivizim i UNMIK-ut, çka do të sillte një rikthim në të shkuarën.
Jo më kot, Sputnik dy ditë më parë fliste se do të kishte një përhapje trazirash nga Tirana në Prishtinë e Preshevë.
Diçka po zihet dhe asgjë nuk është e rastësishme. Problemi këtu është se më kë janë Thaçi, Haradinaj e kompani që kanë kërkuar pezullimin e Speciales, ndërkohë që Fatmir Limaj e Vetëvendosje kanë qenë pjesë e krahut tjetër, pra që nuk e lejuan kalimin në Kuvend të nismës destabilizuese?
Që pritet të ketë trazira, këtë e tha edhe kreu i komisionit parlamentar për Kosovën në Beograd, i cili përmendi riaktivizimin e 16 firmëtarëve të pezullimit të Speciales në një ushtri të re, e cila nuk do të jetë më një Kumanovë numër 2, por një vatër zjarri që mund të marrë shumë gjëra me vete.
Por qarqe të ndryshme diplomatike bëjnë të ditur se kjo vatër e re zjarri, sipas të gjitha gjasave do të jetë në veriun e Kosovës, aty ku përpara se Serbia të vendosë braktisjen e Kosovës, kërkon të marrë sa më shumë territor.
Një javë më parë, presidenti serb e bëri të qartë këtë në një letër drejtuar punonjësve të Trepçës, ku shpalli që “shumë shpejt e gjithë Trepça do të jetë e jona”.
Është aksiomë e njohur, që në të gjithë këtë kontekst ku trazirat profilohen si të pashmangshme, lojra të rënda si ajo që tentoi Hashim Thaçi konsiderohen si “normale”. Po ja që këtë herë nuk e lanë “gjarprin” që të lëvizë siç duhet. Ndërkombëtarët e bënë President dhe atë ditë duket se e kanë mbyllur “detyrimin” me ish-kreun e PDK-së. /tesheshi.com/
