Çfarë plani ka për Katalonjën, si mund të reagojë qeveria spanjolle dhe si do të sillet BE? Der Spigel në një artikull të saj analizon situatën pas referendumit të së dielës ku mbi 90 % e katalanasve që morën pjesë në votim u shprehën pro pavarësisë.
Debati lind pasi në referendum morën pjesë vetëm 42 % e votuesve, kjo e ndihmuar edhe nga dhuna e policisë, e cila ndërhyri në shumë prej qendrave të votimit, madje duke tërhequr zvarrë edhe votuese femra.
Ndarja zyrtare e Katalonjës nga Spanja është “çështje ditore”, tha presidenti i rajonit, Puigdemont në një intervistë për rrjetin britanik BBC. Kjo ka zgjatur paksa, pasi pritet përfundimi i numërimit të votave nga diaspora. “Kjo tregon se ne mund ta shpallim pavarësinë në fund të javës ose të javës së ardhshme,” tha ai.
Kryeparlamentari i Katalonjës ka thirrur seancën plenare dhe aty pritet të caktohet data e shpalljes së pavarësisë. Mediat spanjolle shkruajnë se Parlamenti rajonal do të mblidhet të hënën.
Nëse Katalonia shpall pavarësinë atëherë nuk do ketë më kthim prapa. Puigdemonts ka partner në koalicion partinë e ekstremit të majtë CUP, që thotë se tashmë gjithçka ka përfunduar.
Por deklaratat në Barcelonë kanë rritur presionin e kryeministrit spanjoll Mariano Rajoy. Opozita spanjolle flet për fillimin e një dialogu me katalonjasit. Nëse kjo nuk bëhet, situata mund të tensionohet edhe më tej.
Si mundësi e fundit për Rajoy është artikulli 155 i Kushtetutës. Kjo parashikon që në rast se një qeveri e rajonit autonom nuk ndjek ligjet dhe Kushtetutën, atëherë Madridi mund ta shfuqizojë autonominë dhe të marrë nën kontroll direkt komunat katalonjase. Në këtë rast do rrëzohej nga pushteti Puidgemont.
“Kjo mund të ishte e dhimbshme, por ne do zbatojmë gjithë metodat për ta parandaluar pavarësinë”, tha ministri i drejtësisë Rafael Catalá.
Gjithashtu mbreti Felipe VI akuzoi drejtuesit e Rajonit për “qëndrime të papërgjegjshme” që rrezikojnë stabilitetin ekonomik dhe social të Katalonjës dhe gjithë Spanjës.
Procedura gjyqësore janë ngritur për shefin e policisë katalonjase si dhe për përfaqësuesit e lëvizjes për pavarësi.
BE deri tani është treguar e përmbajtur, por nëse Katalonja shpall pavarësinë atëherë Brukseli duhet të flasë.
Pozicioni zyrtar aktual është se Katalonja nuk do jetë vend anëtar i BE. Kjo mbështetet me doktrinën e Prodit të 2004-ës. Brukseli ka frikë se situatë mund të shfrytëzohet nga rajonet tjera për referendume ndarjeje si te flamanët në Belgjikë, korzikasit në Francë ose Lega Nord në Itali.
Kancelarja gjermane Angela Merkel e sheh problemin e Katalonjës si çështje të brendshme të Spanjës. /tesheshi.com/
