Nga Blendi Gashi
Ramush Haradinaj, në ditën e parë të punës, ka treguar se nuk i mungon energjia, duke zhvilluar dhjetra takime me palë të ndryshme. Ai që në mbledhjen e parë të ekzekutivit i bëri të ditur ministrave se nuk dëshiron t’i shohë duke ndenjur vetëm në kolltuke, por të përveshin mëngët dhe të bëjnë planin e punës, pasi siç tha, “Kosova nuk ka kohë për të humbur dhe duhet shumë punë në të gjithë sektorët”.
Kryeministri edhe ditën e dytë e nisi me vrull ku me disa nga ministrat doli në terren për të parë nga afër problemet me prodhimin e energjisë, ndërsa premtoi zgjidhje të shpejtë për banorët e zhvendosur të fshatrave Hade dhe Shipitullë, me qëllim që t’i mundësohet KEK-ut të vazhdojë operimin me gërmimet, përkatësisht nxjerrjen e qymyrit me qëllim të prodhimit të energjisë elektrike.
Ky ishte një nga premtimet e bëra gjatë fushatës zgjedhore, ku gjithashtu ka folur për rritje pagash në sektorë të ndryshëm, zgjidhjen e Demarkacionit, liberalizimin e vizave, etj. Për të mësuar nëse do i japë zgjidhje problemeve, duhet pritur të paktën 100 ditëshi dhe më pas mund të bëhet një vlerësimi se ç’drejtim të ri mund t’i sjellë vendit, pasi dinamika nuk duhet ngatërruar me rezultatet. Pavarësisht vrullit të madh që ka marrë Haradinaj qysh në fillim, analistët politikë shprehen skeptikë për rezultate të prekshme që do të ndikojnë në mirëqenien e qytetarëve pasi thonë se edhe kjo qeveri do të ketë në fokus të saj të ashtuquajturat temat e mëdha si Demarkacioni, “Zajednica” por jo vetëm.
Prioritet do jenë temat e mëdha, jo mirëqenia e qytetarëve…
Politilogu Mentor Tahiri, qeverinë “Haradinaj 2” e quan një strukturë kompromisesh partiake dhe individuale, në krye më shumë se një shef të qeverisë.
Sipas tij, qeveria e re e ka të pashmangshme që të ballafaqohet me tema të mëdha si çështja e Demarkacionit me Malin e Zi dhe ajo e Asociacionit, ndërsa shton se ende nuk dihet se me çfarë do të ngjajë skena politike pas veprimeve të mundshme të Gjykatës Speciale.
“Megjithatë tema si këto, nuk do të preken së paku deri në përfundimin e zgjedhjeve lokale të cilat mbahen në tetor, kurse deri atëherë çdo veprim karshi këtyre temave do të jetë më shumë i orientuar për të krijuar përshtypje te opinioni publik. Në një ambient politik sikurse ky i cili po mbizotëron në Kosovë, është vështirë e pritshme që ministrat e rinj të ushtrojnë profesionalizëm, pasi do t’u duhet të balancojnë jo vetëm me interesat e subjekteve politike që përfaqësojnë, por edhe të interesave klanore të ndryshme brenda vetë subjekteve”, thotë Tahiri për tesheshi.com.
Seb Bytyqi, ligjërues i shkencave politike në Universitetin e Uinçesterit në Angli nuk pret rezultate të mëdha pasi qeveria e re nuk ka kohë që të fokusohet tek problemet konkrete me të cilat ballafaqohen qytetarët.
“Pres variacione në rezultate mes mimistrive dhe në përgjithësi jo rezultate shumë të mëdha, sidomos në rritje të punësimit dhe luftën ndaj varfërisë e korrupsionit.
Një nga sfidat kryesore është menaxhimi i vetë qeverisë së një koalicioni me aq shumë parti.
Problemet tjera janë Demarkacioni dhe Asociacioni, rrjedhimisht nuk do të ketë shumë kohë të fokusohet qeveria në probleme konkrete të qytetarëve ku një prej tyre është papunësia”, thotë Bytyqi për tesheshi.com.
Njohësi i rrethanave politike, Arsim Haziri, e sheh të vështirë funskionimin e qeverisë “Haradinaj”, pasi thotë se në të operojnë mbi 20 subjekte dhe mes tyre ka pёrqarje dhe ambicie tё sёmura politike.
Ai nuk pret, që siç e quan qeveria e “numrave” , të korrë rezultateve sidomos në fushën ekonomike, pra përmirësimin e gjendjes ekonomike dhe si minus përmend ndarjen e Ministrisë së Bujqësisë për Listën Serbe.
Kurse sfidë jo të lehtë për qeverinë e re e sheh edhe ballafaqimin me temat e mëdha, si Demarkacioni, Asociacioni, lufta kundër krimit, dhe formimin e ushtrisё, pa pёrjashtuar edhe fuqizimin e rolit opozitarё, përballjen me të.
“Pra kur ekziston kjo pasqyrё mbi kёtё qeverisje, do tё konsideroja se ky ekzekutiv do tё jetё edhe mё neglizhues se mё i hershmi, do tё jetё edhe mё i pamundshёm pёr t’i dhёnё zgjidhje adekuate vendit, duke mos veçuar aspak edhe njё ballafaqim tё hapur me LVV-n, pёr çështje e lartpёrmendura”, thotë Haziri për tesheshi.com. /tesheshi.com/
