Nga Bekim Laci
Gjykata e Apelit në Shkup, do shqyrtojë sot rastin ‘Monstra’, respektivisht ankesën për dënimet me burg të përjetshëm të cilat u shqiptuan më herët për vrasjen e pesëfishtë te liqeni i Smillkovcit në Shkup.
Avokatët mbrojtës do të paraqesin argumentet e tyre për të kërkuar kështu shfuqizimin e vendimit të shkallës së parë, ndërsa do të shqyrtohet dhe shfajësimi i njërit nga të akuzuarit, pasi vendimi i tillë i gjykatës u ankimua nga prokuroria.
Mbrojtja insiston në lirimin e të dënuarve, sepse siç thonë avokatët, dënimi është shqiptuar vetëm në bazë të një deklarate të dhënë nga një dëshmitar i mbrojtur.
Avokati mbrojtës, Naser Raufi, duke komentuar pohimet e kryeprokurorit Lupço Shvrgovski se posedon prova të mjaftueshme të cilat vërtetojnë fajësinë e të dënuarve, tha se një gjë e tillë nuk është fare e vërtetë: “Nëse vërtetë kanë prova, por që nuk më janë prezantuar, dhe kjo është kundërligjore. Deri më sot, të gjitha provat të cilat më janë prezantuar në cilësi të mbrojtjes të të akuzuarve nuk dëshmojnë fajësinë”, deklaroi Raufi, i cili ka parashtruar ankesë tek Këshilli Penal i Gjykatës Themelore në Shkup për, siç tha, paregullsi gjatë procedurës së hetimit: “Përpos dëgjimit të fundit të dëshmitarit të mbrojtur, asnjëherë nuk kam qenë i ftuar të marë pjesë në seancat me dëshmitarët tjerë të mundshëm. Unë vërtetë nuk e kam të qartë përse është i mbrojtur kur nuk është dëshmitar okular”, tha Raufi.
Për avokatin tjetër të mbrojtjes, Mitko Sollakov, konfirmimi eventual i dënimeve nga Gjykata e Apelit, do të jetë një rast i paprecedent në gjygjsinë e Maqedonisë, që të shqiptohen dënime vetëm në bazë të një deklarate nga një dëshmitar i mbrojtur.
Së fundmi, procesi gjygjësor ‘Monstra’ ka filluar të marë një tjetër dimension, pas dyshimeve të cilat i shfaqi kreu opozitar, Zoran Zaev, i cili gazetës gjermane “Die Zeit” i deklaroi se posedon audio-incizime nga biseda telefonike të përgjuara në bazë të të cilave mund të vërtetohet se njerëzit që mbahen në burg janë të pafajshëm, por deri më sot nuk ka publikuar asgjë nga këto pretendime, përkundër apeleve që i dërguan familiarët e të dënuarve, për të cilën gjë tesheshi.com ka informuar më herët.
Ndërkohë që publikimin nga Zaev kanë filluar të kërkojnë edhe prindërit e maqedonasve të vrarë, të cilët dyshojnë se vrasja është porositur nga njerëz të pushtetit për interesa personale që lidhen me biznes.
Nuk përjashtohet mundësia që Zaev të dorëzojë në gjykatë biseda të transkriputuara, pasi disa herë ka deklaruar se publikimi i këtij materiali, siç e quan ai sensitiv, mund të shkaktojë trazira të përmasave më të mëdha.
Më 30 qershor të vitit të kaluar ,Alil Demiri, Afrim Ismailoviç, Agim Ismailoviç, Fejzi Aziri, Haki Aziri dhe Sami Luta, u dënuan me burg të përjetshëm për vrasjen e pesë maqedonasve nën akuzën për terorizëm. /tesheshi.com/
