Bashkimi Evropian ka konfirmuar se Përfaqësuesi i Lartë Josep Borrell ka pranuar propozimin e kryeministrit të Kosovës Albin Kurti për uljen e tensioneve në veri, por zyrtarët e Brukselit thonë se kjo letër nuk përmban hapat e nevojshëm për qetësimin e situatës.
“Deri më tani nuk kemi parë një hap të vetëm vendimtar dhe të menjëhershëm të kryeministrit Kurti të nevojshëm për të de-përshkallëzuar situatën”, tha zëdhënësi i BE-së, Peter Stano në një përgjigje me shkrim për Radio Televizionin e Kosovës (RTK).
“Ngjarjet e fundit në veri të Kosovës vetëm dëshmojnë se përshkallëzimi është ende duke vazhduar dhe kjo është në kundërshtim me interesat e Kosovës dhe të gjithë popullit në Kosovë”, tha Stano.
Bashkimi Evropian kërkon nga Kosova që menjëherë të pezullojë punën e policisë në objektet komunale në veri, që kryetarët e zgjedhur shqiptarë të kryejnë detyrat e tyre nga objektet alternative, si dhe të mbahen zgjedhje të jashtëzakonshme për katër komuna në veri, me pjesëmarrjen e serbëve.
Nga ana tjetër, Stano ka konfirmuar se zyra e Borrelit u ka shpërndarë vendeve anëtare të BE-së atë që ai e quajti një përmbledhje të masave që duhen marrë nëse Kurti nuk ndërmerr hapa adekuatë dhe urgjentë për qetësimin e situatës.
Ai shtoi se bisedimet në këtë drejtim mes vendeve anëtare janë duke vazhduar, dhe se Borrell është në kontakt edhe me liderët në rajon.
Shtetet e Bashkuara të Amerikës dhe BE-ja po përpiqen të përdorin presion shtesë për të zgjidhur tensionet e reja mes Kosovës dhe Serbisë, të cilat u përshkallëzuan në fund të majit, kur 30 paqeruajtës u plagosën në përleshjet midis demonstruesve serbë dhe anëtarëve të KFOR-it.
Më herët, Kosova dhe Serbia kanë arritur marrëveshje për normalizimin e marrëdhënieve, pas vitesh tensioni, por përveç pëlqimit deklarativ për pajtim, nuk është bërë shumë në aspektin e hapave konkretë. /tesheshi.com/
