Nga Blendi Gashi
Ndonëse autoritetet në Prishtinë dhanë shumë premtime për rrënimin e murit ilegal në veri të Mitrovicës, ai vazhdon të qëndrojë në këmbë.
Testi i parë për institucionet është pikërisht dita e nesërme, 1 shkurti, ku pritet të mësohet nëse eskavatorët do zbarkojnë në veri për ta rrënuar apo do e presin afatin e dytë që është më 17 shkurt, saktësisht në Ditën e Pavarësisë.
Për “po” apo “jo” rrënimin e këtij muri javët e fundit ka pasur qëndrime të ndryshme, ku si një prej mundësive më të këqija është parë shpërthimi i trazirave në veri.
Dhe për të mos ndodhur kjo, raportohet se çështja e murit do shtrohet në tavolinën e bisedimeve në Bruksel. Për këtë pikë ka mendime kontradiktore mes institucioneve të vendit.
Ndërsa presidenti Thaçi, sot përmes një deklarimi për media mohoi se do diskutohet për murin, pasi tha se “është çështje e brendshme”, mendim krejt tjetër ka dhënë ditë më parë ministri i Mjedisit, Ferat Shala. Ky i fundit ka deklaruar se çështja e murit përkohësisht ka kaluar në nivelin qendror.
“Kjo çështje tashmë i ka kaluar të gjitha kompetencat e Ministrisë sonë përkohësisht, dhe tashmë ne jemi në pritje të vendimeve qeveritare dhe siç jemi të informuar tashmë kjo është edhe në agjendë të Brukselit dhe normal që duhet që t’i presë instancat më të larta”, ka thënë Shala.
Andaj, duke parë këto deklarata kundërthënëse shtrohet pyetja mos rastësisht Thaçi është dakorduar diç fshehtas me Vuçiçin në bisedën telefonike pikërisht për murin?
Për murin sot është deklaruar edhe shefja e Bashkimit Evropian në Kosovë, Nataliya Apostolova, e cila përmes një postimi në llogarinë e saj në Twitter, ka bërë të ditur se ende nuk është arritur asnjë marrëveshje për këtë problematikë, duke nënkuptuar se për këtë çështje duhet biseduar palët.
“Do të isha e lumtur nëse do të kishte marrëveshje rreth murit në Mitrovicë, por ende nuk ka diçka të tillë. Diskutimet vazhdojnë dhe unë shpresoj që së shpejti të gjendet një zgjidhje”, ka shkruar Apostolova.
Analisti politik Faik Krasniqi, nuk beson se muri do të rrënohet muajin shkurt ashtu siç është premtuar.
Ai thotë se një shtet sovran nuk miraton rezoluta për rrënimin e mureve që kanë për qëllim ndarjen e territorit të saj në vija etnike, por me një urdhër dhënë forcave të sigurisë, do rrënonte një muri të tillë.
“Nëse muri në Mitrovicë mbetet dhe qeveria nuk arrin ta eliminojë, kjo është një shenjë shumë e keqe, që shënon ndarjen territoriale të serbëve të Kosovës. Edhe pse ka pak gjasa të ndodh që nesër të bisedohet për murin gjatë bisedimeve me palën serbe në Bruksel, për një çështje të brendshme të saj, Kosova as që do të duhej të bisedonte, por atë mur do të duhejta rrënonte ditën që ka filluar të ndërtohej”, thotë Krasniqi për tesheshi. com.
Ndërsa analisti tjetër, Azem Vllasi mendon se muri do të bëhet pjesë e dialogut në Bruksel, pasi sipas tij nuk është pjesë e marrëveshjes për revitalizimin e urës.
“Muri do të bëhet pjesë e negociatave në Bruksel. Është një paaftësi dhe joseriozitet, e Serbia vazhdimisht e përsërit që Kosova është pjesë e saj. Këtë haptas e bën me dije”, ka thënë për mediat Vllasi.
Ndryshe, krerët e shtetit janë shprehur të bindur se muri do të rrënohet, nëse jo më 1 shkurt, gjithsesi më 17 shkurt, duke parë se palët në nivel presidentësh dhe kryeministrash nesër vazhdojnë Ditën e Pavarësisë. /tesheshi.com/
