Qeveria e Marokut dha betimin me datë 05 Prill 2017, respektivisht 6 muaj pas zgjedhjeve të fundit parlamentare që u mbajtën në tetor të vitit 2016.
Kryeministri i ri i Marokut, Dr. Sa’dudine El Othmani, kryetar i Këshillit Kombëtar të Partisë së Drejtësisë dhe Zhvillimit u mandatua nga mbreti i Marokut para dy jave për të themeluar qeverinë e re. Kjo erdhi pas një pritjeje prej pesë muajsh, që kur mbreti kishte mandatuar me herët z. Abduilah Binkirane, kryetar i Partisë së Drejtësisë dhe Zhvillimit, i cili për shkaqe të mospajtimit me partenerët e mundshëm të koalicionit nuk arriti ta formojë qeverinë.
Dr. El Othmani, i cili më herët ishte Ministër i Punëve të Jashtme të Marokut, pas 10 ditë negociata arriti të formojë koalicionin e gjerë qeverisës dhe kështu shpëtoi pozitën e kryeministrit që të mos kalonte te partia e dytë fituese e zgjedhjeve.
Maroku një vend shumë i rëndësishëm në Afrikën Veriore; ende nuk e ka njohur pavarësinë e Kosovës, për shkak të Saharës Perëndimore, një rajon i cili ka shpallur pavarësinë nga Maroku e që ende nuk njihet ndërkombëtarisht. Por edhe pse Kosovën nuk e njeh Maroku si shtet, Kosova nuk është e panjohur për kryeministrin e ri maroken. Ai në shtëpinë e tij ka pritur mysafirë nga Kosova disa herë. Madje duke qenë Ministër i Jashtëm të Marokut (2012) ai nënshkroi votën pro për anëtarësimin e Kosovës në BERZH. Ishte deputeti i Kosovës, Amir Ahmeti, mik i kryeministrit aktual të Marokut, që më 2012 ia dorëzoi personalisht në shtëpinë e tij notën verbale dhe siguroi atë votë.
Kurse para kësaj, Amir Ahmeti e ka vizituar edhe një herë mikun e tij Dr. El Othmanin së bashku me ish-zv.kryeministrin e Kosovës, Behgjet Pacollin, i cili ishte në një tur në Afrikë për njohjen e Kosovës. Por edhe në disa takime tjera të më hershme, ku z. Ahmeti sa herë takohej me të por edhe me miq tjerë të politikës në Lindjen e Mesme, iu shpjegonte për Kosovën dhe rëndësinë e njohjes së pavarësisë për të e për t’u barazuar me shtetet e tjera duke fituar ulësen në OKB.
Në kohën kur në Paris u votua për Kosovën në UNESCO, Dr. El Othmani nuk ishte anëtar i kabinetit qeverisës të Marokut, fatkeqësisht edhe vota e Marokut ishte kundër. Tani që Kosova prap synon anëtarësimin në UNESCO, shpresojmë që ajo votë të jetë pro. /tesheshi.com/
