Drejtues të organizatave jo-qeveritare që monitorojnë punën e Kuvendit të Kosovës paralajmërojnë se në seancën e 1 shtatorit, ku pritet të mësohet fati i Demarkacionit me Malin e Zi, mund të ngjajnë disa skenarë.
Valmir Ismaili, një ngathemeluesit e organizatës “Demokraci Plus” i kundërshton zërat se kjo çështje mund të prodhojë luftë civile në vend, ndërsa sheh të mundshme protestat nëse ratifikohet marrëveshja.
Ismaili në një intervistë dhënë për portalin tesheshi.com flet edhe për aferën e përgjimeve “Pronto2”, për mundësinë e mbajtjes së zgjedhjeve dhe liberalizimin e vizave.
Intervistoi: Blendi Gashi
Kanë mbetur edhe më pak se një javë deri në seancën plenare kur do të hidhet në votim ratifikimi i Demarkacionit me Malin e Zi. Çfarë priti të ndodh në këtë seancë?
Krahas skenarit të miratimit të marrëveshjes, janë edhe disa skenarë tjerë që mund të mund të ndodhin në seancën e 1 shtatorit. Mund të ndodh një përsëritje e skenave që tashmë opinion i ka parë në Kuvendin e Kosovës. Nuk përjashtohet përdorimi i gazit lotësjellës dhe mjeteve tjera të përdorura më herët nga opozita. Dallimi i vetëm me 1 shtator mund të jetë që opozita do të jetë e ndarë sa i përket mënyrës së kundërshtimit. Pra, Vetëvendosje do të insistoj që me çdo kusht dhe mjet të kundërshtoj miratimin e marrëveshjes me Malin e Zi, përderisa AAK dhe NISMA, veç janë deklaruar që kanë hequr dorë nga format ‘jo-parlamentare’ të kundërshtimit.
Skenari tjetër është që të mos mbahet fare seanca nëse koalicioni nuk arrin të mbledhë votat e nevojshme paraprakisht. Dhe skenari i fundit mund të jetë hedhja në votim, dhe mos-miratimi i saj nga Kuvendi.
Kjo çështje ka polarizuar tej mase edhe opinionin publik. Votimi eventual i kësaj marrëveshje a mund të rrezikoj luftë civile në vend?
Jo, qytetarët e Kosovës kanë vuajtur mjaft dhe shteti ynë nuk e ka luksin që të ketë një luftë civile. Miratimi eventual i marrëveshjes do të mund të nxiste protesta tek një numër i qytetarëve, nuk përjashtohet mundësia që ato edhe të jenë të dhunshme, por lufta civile nuk mund të ndodhë në Kosovë.
Afera “Pronto”, aktorët vështirë se mund të vihen para drejtësisë…
Të kalojmë te afera e përgjimeve “Pronto”. Si i keni parë incizimet e publikuara nga mediet? A është kjo ‘kapje e shtetit’, dhe a duhet të japin përgjegjësi akterët?
Afera “Pronto” nuk është diçka e re për Kosovën, është vetëm vazhdimësi e përgjimeve të disa viteve më parë. Ne jemi dëshmitarë që punësimet nëpër institucione publike/shtetërore dhe bordet e ndërrmarrjeve publike janë tërësisht të politizuara. Këto përgjime vetëm se i kanë vulosur ato që organizata të shoqërisë civile dhe opinionist të ndryshëm i kanë dhënë për vite të tëra.
Skandalet e zbuluara nga afera “Pronto” janë shumë serioze, prandaj prokuroria e shtetit ishte dashur t’a trajtoj këtë çështje me prioritet dhe të ndjekë akterët e përfshirë në këtë aferë. Problemi këtu është që në këtë aferë kanë dalë gjëra të cilat inkriminojnë edhe degën e drejtësisë, prandaj është pak e vështirë të pritet që personat të cilat përmenden në këtë aferë të marrin masat e duhura.
Si e shihni heshtjen e LDK-së karshi aferës së përgjimeve? A mund t’i ndal në skenë edhe LDK-së ndonjë aferë e tillë? A do të duhej të dilte LDK nga koalicioni me PDK-në?
Siç e thashë edhe më lartë, afera “Pronto” nuk është diçka e re, disa nga këto përgjime kanë dalë shumë para zgjedhjeve të vitit 2014, prandaj LDK nëse do të ishte sinqerisht kundër së kapjes së shtetit nuk do të hynte fare në koalicion me PDK. Prandaj është e kotë të pritet që LDK do të dalë nga koalicioni për diçka që ata e kanë ditur paraprakisht se ekziston.
Zgjedhjet parlamentare, më 2017-të…
A pritni të ketë zgjedhje këtë vit? Shkuarja në zgjedhje a do të ishte zgjidhja përfundimtare e krizës politike?
Mos-ratifikimi i marrëveshjes për Demarkacionin me Malin e Zi mund të jetë një lloj katalizatori për përshpejtimin e mbajtjes së zgjedhjeve të parakohshme në Kosovë. Megjithatë, është pak e vështirë të thuhet nëse zgjedhjet do të mbahen këtë vit. Sipas të gjitha gjasave, zgjedhjet e ardhshme qendrore do të mbahen së bashku me zgjedhjet lokale që parashihen të mbahen në vitin 2017.
Për fund, a pritni të ndodh liberalizimi i vizave sivjet?
Pavarësisht ratifikimit apo jo të marrëveshjes për kufirin me Malin e Zi, liberalizimi i vizave, përkatësisht lëvizja e lirë e qytetarëve të Kosovës pa viza drejt BE-së nuk pritet të ndodhë para fillimit të vitit 2017. /tesheshi.com/
