Kuvendi i Kosovës, sot pasdite në ora 16:00, pritet të mbajë vazhdimin e seancës plenare. Por se çfarë mund të ndodhë, që nga organizimi dhe përmbajtja e seancës, as pozita dhe as opozita saktësisht nuk e kanë të qartë.
Deputetë të mazhorancës, krahut opozitar, analistë dhe pjesëtarë të shoqërisë civile, njëzëri e vlerësojnë gabim thirrjen e seancave plenare pa një marrëveshje mes partive politike, dhe shprehin brengën se situata mund të eskalojë në dhunë.
Deputetja e LDK-së, Vjosa Osmani dhe deputeti i Vetëvendosjes, Ilir Deda kanë bërë të ditur se nuk do të marrin pjesë në seancë pasi nuk duan më të jenë pjesë e skenave të pahijshme që mund të ndodhin sërish në institucionin ligjvënës.
Deputetja Osmani e ka quajtur gabim thirrjen e seancave sidomos pas ftesës së presidentes Jahjaga për takime me liderët e partive në kërkim të gjetjes së një zgjidhjeje.
“Na thërrasin neve në seancë të eksperimentojnë. Kuvendi nuk është arenë lufte. Duhet të gjindet zgjidhje ose duhet të mos thirren seanca. Heronjtë e vërtetë të Kosovës janë ata që hapin rrugë për bashkëpunim”, ka deklaruar Osmani, në emisionin Click të RTV21, transmeton portali tesheshi.com.
Deputeti Deda ka thënë se refuzon të shkojë në një seancë ku shpërfaqet një arrogancë neveritëse nga pozita.
“Mundemi me pas një vikend të nxehtë, por jo me temperatura. Thirrja e seancës në këto kushte është provokim kur nuk ka gatishmëri të merren vesh. Duhet t’i japin të paktën një javë kohë presidentës e nuk i është dhënë as tre ditë”, tha ai, në të njëjtin emision.
Dukagjin Gorani, njohës i rrethanave politike në vend, thotë se ka frikë se palët e kanë të pamundshme për të gjetur kompromis, që është rruga e tretë. 
“Mund të përfundoi me një arbitrazh ndërkombëtar, që njërës palë mund t’i mbyllet goja e që ajo dihet se mund të jetë opozita. Frikësohem se nesër mund të ketë sitatuata të eskalimit, që ky pushtet së bashku me ndërkombëtarët me ndërmarrë një veprim brengosës, shpallja e dikujt në opozitë, organizatë ekstremiste”, tha Gorani, në RTV21.
Driton Selmanaj nga shoqëria civile, poashtu shprehu brengën për thirrjen e seancave pa u arrtiur asnjë marrëveshje mes palëve.
“Qasja që po e shofim se nuk ka asnjë lëvizje, ka për më tepër ashpërsim të gjuhës nga ndërkombëtarët. Mirë do të ishte që nesër shumë deputet ta sabotonin seancën e nesërme”, ka deklaruar Selmanaj në emisionin Click.
Analisti Halil Matoshi, në emisionin në fjalë ka thënë se nuk e kupton pse kjo mësymje për mbajtje të seancave plenare kur nuk është arritur asnjë normalitet në mes palëve.
“Kompromisi është i domosdoshëm. Pa një kompromis të dhimbshëm nga të dyja palët vështirë se mund të gjindet zgjidhje. Shtegdalaja e vetme është një moratorium dhe shkuarja në zgjedhje vitin që vjen”, ka thënë ai.
Përgatiti: Blendi Gashi – /tesheshi.com/
