Më në fund është realizuar një komunikim direkt në nivel të lartë mes SHBA dhe Rusisë. Më saktë, ka qenë Sekretari amerikan i Mbrojtjes Lloyd Austin, i cili ka patur një bisedë telefonike me homologun rus Sergei Shoigu, këtë të premte.
Raportohet që Austin t’i ketë kërkuar kreut të mbrojtjes ruse një armëpushim të menjëhershëm në Ukrainë, duke theksuar njëherësh rëndësinë e ruajtjes së linjave të komunikimit, siç njoftoi Pentagoni.
Kjo është hera e parë që Austin flet me Shoigu që nga 18 shkurti, tha në një deklaratë zëdhënësi i Pentagonit John Kirby. Komunikimet mes SHBA-së dhe Rusisë kanë qenë të rralla që nga fillimi i luftës, aq më tepër mes zyrtarëve të rangut të lartë.
Këtë javë, Sekretari Amerikan i Shtetit theksoi se Rusia nuk ka ndërmend të përballet ushtarakisht me NATO-n. /tesheshi.com/
