Ndërsa ngre pyetjen nëse ka ndonjë të përbashkët mes Zhos Profesionistit, personazhit të famshëm të filmit “Le professionnel”, luajtur nga i madhi Jeane-Pol Belmondo dhe Ramush Haradinajt, gjëja e parë që të shkon ndërmend është fiziku i tyre; por asgjë tej kësaj. Ramushi në të ritë e tij ka qenë luftëtar e me vonë politikan, ndërsa Belmondo ka qenë aktor gjithë kohën. Ramushi i përket si protagonizëm publik viteve `90 e këtej, ndërsa Belmondo emrin e madh e bëri në vitet ’60-`70. Por ka dhe një pikëtakim tjetër dhe ajo është Franca.
Të enjten, në deklarimet pas lirimit nga burgu, Ramushi shfaqi habi me gjestin e autoriteve franceze për t’iu bindur fletë-arresteve serbe, sipas tij dhe juridikisht pa vlerë, ndërkohë që tha se vende të tjera europiane nuk po e bëjnë të njëjtën gjë.
Por Franca, ah Franca! Vendi që tej shkëlqimit historik, që duhet thënë ia ka mveshur më tepër materializmi dialektik, bart dhe shumë mëkate në politikëbërjen e saj, sidomos atë të jashtme, ku të gjitha të çojnë tek një fjalë: pabesi! Të paktën, Kosova e pasluftës e ka ndjerë këtë, kur është fjala për veriun e saj.
Dhe tani dalim tek Zhosi. Kur ne, brezat e atyre viteve e shihnim filmin e famshëm me Jean-Polin trupbukur, mjeshtër i grushtit dhe i pistoletës, harroheshim në këto detaje të shijes adoleshente e rinore dhe pak vëmendësoheshim mbi mesazhin e filmit, fabulën e tij, e cila nuk ishte gjë tjetër veçse një denoncim i pabesisë franceze, pikërisht në politikat e saj të jashtme, ku veçohen vendet kolonizatore.
Zhos Profesionisti ishte një specialist i shërbimit sekret francez i dërguar në një vend të Afrikës, ish-koloni për të vrarë presidentin e këtij vendi pasi ai nuk po bindej.
Mirëpo pakti ndryshon dhe presidenti bën deal me Parisin. Zhosi burgoset dhe arrin të arratiset.
Kthehet në Francë dhe shërbimi sekret ngarkon kreun e operacioneve për ta vrarë. Mirëpo Zhos arrin me shkathtësi të fusë në kurth të gjithë shërbimin dhe të jetë gjithmonë përpara tyre. Në fund vret presidentin Nzhala të një vendi Afrikan që në film nuk jepet por përdoret një ankronim adekuat Malagaëi. Kështu prishet marrëveshja dhe vendi hyn në krizë nafte.
Dhe Ramushi nëse bën vaki e nuk e ka parë deri më sot Zhosin, bën mirë ta shoh. Që mos befasohet dhe të jetë i përgatitur për gjithçka. Ka dhe më keq, pasi nëse Zhosi ishte gjithsesi francez, ndërsa Ramushi është thjesht një dukagjinas! /tesheshi.com/
