Nga Blendi Gashi
Ngjarja me trenin serb e ka lënë paksa në hije Ramushin, tashmë prej dy javësh në Francë.
Javën e kaluar, autoritetet franceze e liruan me kusht, duke e detyruar shtetin serb që të reagojë fuqishëm duke thënë se ka dëshmitarë të rinj dhe do të këmbëngulë në ekstradimin e tij.
E ndërsa treni u ndal, Haradinaj vijon të jetë peng i serbëve.
Dhe fajtore për moslirimin e plotë të ish-komandatit të Dukagjinit, po shihen krerët e institucioneve’ konkretisht Ministria e Jashme për mosangazhim të duhur, duke parë përkushtimin e plotë të shtetit serb për ekstradimin e tij.
Deputet të mazhorancës, bashkëpartiakË të Haradinajt dhe opozitarë, thonë se shteti është në gjumë të thellë dhe në disavantazh me Serbinë për rastin në fjalë.
Deputeti i PDK-së, Shukri Buja, që është zëri më i fuqishëm anti- Mustafa, thotë se shteti nuk ka bërë e nuk po bën mjaftueshëm për Haradinajn dhe ushtarët e UÇK-së që po ndjeken nga Serbia.
Sipas tij, nuk ka politikë parandaluese, as angazhim të mjaftueshëm te shtetet që na kanë njohur që njëherë e mirë të sqarohen listat politike të Serbisë.
“Nuk ka politikë reciprociteti me Serbine dhe nuk kushtëzohet as vazhdimi i bisedimeve nëse ky shteet vazhdon me politika obstruksioniste dhe nuk tërheq fletarrestet për ish-ushtarët e UÇK-së.
Angazhimi i Ministrisë së Jashtme po ndodh pas arrestimeve dhe më pas po vijnë reagime edhe nga dy ministritë tjera (e Drejtësisë dhe Brendshme) pa efekt!?.
Poashtu edhe Kuvendi nuk është fare në nivel dhe këtë e tregon mos nxjerrja e një resolute për Haradinajn”, thotë deputeti Buja për tesheshi.com.
Rexhep Selimi, deputet i Vetëvendosje-s thotë se qeveria e Kosovës, më shumë i ka lënë dorë të lirë Serbisë që t’i arrestojë qytetarët sesa që ka bërë që t’i lirojë ata kur përfundojnë në qeli me akuza nga Beogradi.
“Ngjajshëm ka ndodhur edhe me rastin e arrestimit të Haradinajt nga policia franceze. Prandaj, nëse sot Haradinaj është i liruar me kusht kjo nuk do të thotë se ai është i lirë dhe nuk do të thotë se qeveria ka bërë diçka për lirimin e tij. Njëkohësisht, qeveria ka mundur që t’i marrë veprimet e nevojshme që Serbia ta ketë të pamundshme që t’i perndjekë luftëtarët e UÇK-së dhe poashtu cilindo qytetarë”, thotë Selimi, për tesheshi. com.
Edhe Avni Arifi, bashkëpartiak i Haradinajt thotë se shteti nuk ka bërë sa duhet që Haradinaj të lihet i lirë plotësisht.
“Përgjigja është ‘JO’ e pastër. E tërë politika e Kosovës është e bazuar në parime retroaktive. Qeveria e Kosovës merret me tema vetëm kur ato vijnë në tavolinë e jo me i ndjek temat me interes. Lista e interpolit ka mundur kaherë të hiqet nga sistemi por as nuk ka pas kërkesë e as lobim për këtë temë.
Qeveria duhet te sqaroj se a ka bërë kërkesë specifike Interpolit për ndonjërin nga ata që kanë qenë në listë dhe nëse po pse jo për Ramushin”, thotë Arifi për tesheshi. com.
Krerët serbë kanë deklaruar se kanë edhe 30 dëshmitarë të rinj kundër Haradinajt, ky i fundit është kundërpërgjigjur duke thënë se “Serbia le të më ndjek sa të jam gjallë, por unë dhe shqiptarët kurrë nuk do nënshtrohemi”. /tesheshi.com/
