Ambasada ruse në Tiranë mësohet se ka kërkuar staf inteligjence shtesë nga Moska, pasi sipas saj ajo ndjehet e kërcënuar nga disa qarqe në Kosovë dhe në Tiranë.
Siç bën të ditur Vizion Plus, kërkesa i është përcjellë Moskës, e cila më pas do të duhet t’i kërkojë zyrtarisht Tiranës zyrtare, pra Ministrisë së Jashtme që të miratojë akreditim diplomatik të një grupi shtesë, nga 35 vetë që tashmë janë akredituar si diplomatë të Federatës Ruse.
Shtimi i një numri shtesë diplmatësh mund të mos përbëjë problem, pasi këto çështje janë në përputhje të konventave ndërkombëtare, por problem do të jetë ndoshta të pranohen një kategori shtesë 007-a nga FSB-ja apo shërbimi sekret ushtarak rus GRU.
Duke qenë një vend i NATO-s, e cila aktualisht ka një përplasje në aspektin e politikave të sigurisë me Rusinë, Shqipëria do të duhet të konsultohet detyrimisht me strukturat e Aleancës së Atlantikut të Veriut, si pjesë integrale e saj.
Dhe ardhja e një grupi 007-ash nga Rusia në Tiranë, apo ndoshta direkt nga “baza humanitare” që Moska ka instaluar në NISH dhe që mbulon gjithë Ballkanin, mund të shihet si një rast jo oportun.
Aq më keq kur vendi rrezikohet nga trazira, si pasojë e përshkallzimit të paralajmëruar nga opozita, e që do të kulmojnë më 7 maj në Kavajë.
Prej kohësh rusët po buçasin dhe amplifikojnë trazira në Ballkan, që nga Mali i Zi edhe sidomos në Maqedoni.
Ditën e sotme, rusja Sputnik, në edicionin e saj në gjuhën serbe, shpërthen me akuzën se prapa ngjarjeve të Maqedonisë fshihet CIA.
Aleksandar Rakoviç nga Instituti për historinë e re të Serbisë deklaroi për Sputnik se CIA kishte krijuar UÇK-në dhe metamorfozat e saj.
“Nëse ata thonë se do të ketë konflikt, ata mund të jenë prapa këtyre konflikteve. Trump donte të provonte një politikë të ndryshme, por CIA nuk e la.
Ai nuk arriti të vendosë kontroll mbi CIA-n. Nuk ka vendosur kontroll madje as mbi ambasadorin amerikan në Shkup, ku shumë gjëra ende vazhdojnë të jenë në inerci”, thekson Rakoviç.
Nga ana tjetër, ai vë në dukje se Rusia do të duhet të gërmojë nëpër libra për problemin e identitetit ballkanik dhe skenarët që mund të ndodhin.
“Kam frikë se Rusia ndoshta duhet të shpallte luftë me Malin e Zi.
Kur ju keni makineri të tilla si CIA dhe MI-6 pas këtyre ngjarjeve në Maqedoni, edhe Rusia duhet të kundërpërgjigjet me të njëjtën monedhë”, tha Rakoviç.
Kur është fjala për mundësinë që BE të vendosë sanksione ndaj disa zyrtarëve maqedonas për shkak të bllokimit të institucioneve, për të cilën shkroi revista gjermane Der Spiegel në lidhje me refuzimin vazhdueshëm të Presidentit Gjorge Ivanov për t’i dhënë mandatin liderit të LSDM-së Zoran Zaev, Sputnik thotë se sanksionet janë proces i komplikuar.
“Unë nuk mendoj se do të kishte kaluar, sepse ka vende të tilla si Hungaria, Austria që janë krejtësisht për opsionin konservator në Maqedoni për shkak të krizës politike dhe frikën e rihapjes së flukseve të emigrantëve.
Në këtë kohë Ivanov po bën atë që VMRO është plotësisht në përputhje me Kushtetutën dhe Rregulloren e punës së Kuvendit”, thekson Cvetin Çilimanov, një ish-spiun dhe ekspert sigurie në Shkup, përkrahës i Gruevskit.
Ndërkaq, Rakoviç thotë se nuk është një rastësi që Departamenti i Shtetit njoftoi se partnerët evropianë do të punojnë për të inkurajuar politikanët maqedonas për t’i dhënë fund pengimit të institucioneve shtetërore.
Brukseli dhe Uashingtoni janë unik, dhe kjo është shpallur nga Brian Hoyt Yee, ZëvendësNdihmës Sekretari i Shtetit për Ballkanin.
Ai, një muaj më parë nga Zagrebi njoftoi se formimi i pritshëm i një qeverie të LSDM-së dhe shqiptarëve në Maqedoni do të heqë veton e Greqisë për hyrjen e Maqedonisë në NATO.
“Mali i Zi hyn NATO si një vend ku shumica e popullsisë nuk do të hyjnë. Por në Maqedoni ka një qëndrim të dyfishtë ndaj bashkimit me NATO-n. Në qoftë se Maqedonia do të ndryshojë emrin e shtetit, atëherë banorët do të jenë kundër.
Miqtë tanë maqedonas u gabuan, kur ata kanë njohur Kosovën, kur ata votuan në UNESCO për separatistët shqiptarë, e tani është koha për të korrigjuar gabimet e së kaluarës”, tha Rakoviç.
Çilimanov vë në dukje se për shkak të marrëdhënieve të administratës amerikane me Zaev ka rënë mbështetja për anëtarësimin e vendit në NATO, por shtoi se me ndryshimin e politikës amerikane dhe kjo mund të ndryshojë.
Kur u pyetën se sa kohë Ivanov mund të përballojë presionin, Çilimanov shpjegon se ligjërisht kjo mund të bëhet një kohë të pacaktuar.
Nga ana tjetër, shton ai, në qoftë se Kuvendi nuk mund të zgjedhë një qeveri, do të ketë zgjedhje të parakohshme.
Rakoviç tregon për një aspekt tjetër të krizës maqedonase që duhet të shihet në kontekstin më të gjerë, atë të projektit të “Shqipërisë së Madhe”.
“LSDM-ja nuk ka potencial për konflikt fizik. Ata që e kanë atë janë separatistët shqiptarë dhe ata mund të përfitojnë nëse marrin dritën jeshile nga Uashingtoni. Unë uroj nuk vjen puna deri aty, por do të doja që shqiptarët të marrin një mësim të fortë në rajonin tonë, sepse ato do të sillen edhe më brutalisht.
Atyre u duhet dhënë një përgjigje me forcë, por tani për tani unë nuk shoh që dikush të jetë i gatshëm për të dhënë një përgjigje të tillë “, thotë Rakoviç, duke vënë në dukje në fund ajo do të jetë më e mirë se zgjidhja gjendet në trekëndëshin Moskë-Bruksel-Uashington. /tesheshi.com/
