Nuk ka më hundë e buzë, por buzëqeshje dhe komplimente. Beogradi dhe Prishtina punojnë mirë me telefona çat, por edhe vizita. Ajo e Daçiçit dje në Prishtinë ishte një provë për këtë performancë të re. Por ç’po ndodh në këto marrëdhënie a ka diçka pas dritës së djeshme dhe hijeve të pardjeshme?
Ministri i Punëve të Jashtme të Serbisë, Ivica Daçiç, gjatë qëndrimit të tij në Kosovë ka lavdëruar zyrtarët e Qeverisë së Kosovës për mikpritjen që ia kanë bërë atij dhe ministres së Transportit. “Më duhet të pranoj se njerëzit e Qeverisë së Kosovës kanë qenë mikpritës të mirë. Të gjithë të respektuar, duke filluar nga neutraliteti në konferencë i statusit”, ka thënë ai. “Kemi qenë në hotelin që tani i takon Bexhet Pacollit, por unë e quajta sipas emrit të vjetër “Bozhur”. Më duhet të pranoj se njerëzit nga Qeveria e Kosovës kanë qenë shumë mikpritës. Kanë respektuar çdo gjë, duke filluar nga neutraliteti i statusit të conferences, deri te shkathtësia e përgjithshme”, ka thënë Daçiç për “Blic” dhe shton se përshtypjen më të madhe e ka nga një polic shqiptar. Ndërsa ministrja, Zorana Mihajloviç u shpreh se Prishtina nuk i kishte lënë ndonjë përshtypje të veçantë.
Ministri i Jashtëm i Serbisë, Ivica Daçiç në Prishtinë në takim me Ministrin e Jashtëm të Kosovës Hashim Thaçi dhe në konferencën rajonale “Western Balkans’ 6”, si dhe biseda telefonike e Kryeministrit kosovar Isa Mustafa dhe Kryeministrit serb Aleksandar Vuçiç janë dy zhvillime të reja në raportet Kosovë-Serbi drejt normalizimit, që ndodhën për herë të parë dhe në të njejtën ditë, në 25 mars, derisa në kryeqytetin kosovar po qëndronte komisioneri i BE-së për Politikën e Fqinjësisë dhe Negociatat e Zgjerimit, Johannes Hahn, dhe po pritej të nesërmen Përfaqësuesja e Lartë të BE-së për Punë të Jashtme dhe Politika të Sigurisë, Federica Mogherini, e cila sot viziton edhe Beogradin.
Kryeminsitri kosovar Mustafa, dje, pas takimit me Përfaqësuesen e Lartë të BE-së, Mogherini, njoftoi për bisedën telefonike me Kryeministrin serb Vuçiç.
“Kosova është një vend i cili ka pësuar mjaft shumë nga lufta, bart pasojat e luftës edhe shkatërrimet ekonomike, edhe njerëzit që janë humbur, edhe të pagjeturit, edhe të pakthyerit. Mirëpo, edhe përkundër kësaj, ne e kemi treguar vullnetin që përmes dialogut dhe ndërtimit të besimit të zgjidhim problemet me fqinjët, sidomos me Serbinë dhe poashtu të kemi një komunikim të hapur me komunitetet në Kosovë. Unë mbrëmë kam biseduar edhe me Kryeministrin e Serbisë, z.Vuçiç, lidhur me bashkëpunimin e ardhshëm të Kosovës dhe Serbisë dhe dy palët kemi treguar vullnet që çështjet e veçanta ose të paparashikuara, t’i zgjidhim përmes bisedave dhe përmes kontakteve të drejtpërdrejta”, theksoi Kryeministri Mustafa.
Zv/Kryeministri e Ministri i Jashtëm kosovar, Hashim Thaçi, ka vlerësuar se, “pjesëmarrja e ministrit të Jashtëm të Serbisë, Ivica Daçiç në Konferencën në Prishtinë është mesazh apo një hap përpara për normalizimin e plotë të marrëdhënieve mes Kosovës dhe Serbisë”.
Ardhja e Daçiç në Samitin në Prishtinë, ka theksuar Thaçi, “në të njëjtën kohë është një hap përpara në sjelljen tonë të lidershipit rajonal, të një sjellje evropiane të komunikimit, bashkëpunimit dhe participinmit në konferenca të përbashkëta, në interesa dhe vlera të përbashkëta euroatlantike”.
Në procesin drejt normalizimit të marrëdhënieve, të kryesuar nga BE e mbështetur nga SHBA, në Bruksel janë zhvilluar 24 raunde të dialogut Prishtinë-Beograd në nivel të lartë kryeministror, 23 mes kryeministrave të atëhershëm Thaçi e Daçiç dhe një mes kryeministrave Mustafa e Vuçiç të qeverive të reja të zgjedhjeve 2014 në të dy vendet.
Në 19 prill 2013 është nënshkruar Marrëveshja për Normalizimin e Marrëdhënieve ndërmjet Kosovës dhe Serbisë, e vlerësuar historike, e parafuar nga nga Thaçi e Daçiç, si dhe ndërmjetësuesja, Përfaqësuesja e Lartë e BE-së në atë kohë, Baronesha Catherine Ashton.
Në 10 shkurt 2015 Kosova dhe Serbia arritën Marrëveshjen per Drejtësinë, në takimin e nisur në mbrëmje një ditë më parë, të parin të kryeministrave Mustafa e Vuçiç, ku po ashtu për herë të parë ndërmjetësoi Përfaqësuesesja e re e Lartë të BE-së, Federica Mogherini.
Një zhvillim tjetër i ri Kosovë-Serbi, rezultat i dialogut, është arritja dje pasdite e marrëveshjes, e cila, siç thekson qeveria kosovare “i jep fund strukturës ilegale të ashtuquajtur ‘Mbrojtja civile’ dhe mundëson integrimin e ish-pjesëtareve të sajë në institucionet e Republikës së Kosovës”.
Kjo marrëveshje për zhbërjen e strukturës paramilitare në veri të Kosovës duhet të zbatohet deri më 1 shtator 2015.
Nga shtetet fqinje, vetëm Serbia ende nuk e ka njohur Kosovën e pavarur 7 vite, nga 17 Shkurti 2008, të njohur deri tash nga 108 shtete anëtare të OKB-së.
“Qeveria e Republikës së Kosovës synon që përfundimi i procesit të dialogut me Serbinë të jetë i suksesshëm për të dyja vendet, e kjo për ne nënkupton njohjen e ndërsjellë dhe integrimin në Bashkimin Evropian dhe në NATO. Vetëm kështu do të mund të lihej pas e kaluara e dhimbshme, ndërsa popujve tanë do t’u jepej mundësia që, më në fund, të zinin hapin e zhvillimit e të përparimit të vendeve të tjera të kontinentit”, theksonte Kryeministri Mustafa në seancën solemne të Kuvendit kosovar të festimeve të 7 vjetorit të Pavarësisë.
Po ky normalizim çfarë koncensioni fsheh, a do të ketë Republika e Kosovës një pavarësi stabile apo mos bëhet fjalë për një ”Krime”. Gjthçka nga marrëveshjet duhet të dale në dritë.
(tesheshi.com)
