Kreu i opozitës Lulzim Basha po e mban partinë e tij jashtë zgjedhjeve parlamentare duke tentuar të krijojë një valë qytetare protestash që ai e ka cilësuar “mobindje civile”. Historia na sjell shembujt kur dhe si janë organizuar këto lloj qëndresash, që nga Gandi deri në SHBA.Po cila është rruga që do të zgjedhë PD-ja mbetet ende mister. Prova e parë e fortë do të jetë Kavaja…
Një orë pasi refuzoi ofertën gjermane për zgjidhjen e ngërçit politik me qeverinë, kreu i partisë më të madhe në opozitë, Lulzim Basha, tha se “do të nisim përshkallëzimin e mosbindjes civile anembanë Shqipërisë”. Më tej ai mblodhi krerët e degëve të partisë për të detajuar protestën e organizuar që do të nisë me Kavajën e do të kulmojë me datën 18 qershor, ndërsa një ditë më parë paralajmëroi se qytetarët nuk do të paguanin taksat si shenjë e mosbindjes civile.
Pavarësisht se ishte premtuar të niste të hënën, pra 1 maji, “mosbindja civile” si aksion opozitar nuk është formësuar akoma në detaje. Burime nga PD-ja thanë për tesheshi.com se prova e parë do të jetë Kavaja. “Ne po përgatitemi për të organizuar një miting madhështor si ai i 18 shkurtit në Tiranë për të dhënë mesazhin e parë të fortë të mosbindjes civile që do të bëjë Ramën të tërhiqet”-thanë burimet.
Po deri ku mund të shkojë kjo lëvizje e opozitës?
Burimet saktësuan se do të përdoren të gjitha mënyrat që përfshin “mosbindja civile” si protesta, mopagim taksash, mospagim të faturave të energjisë elektrike, sabotimi i të gjitha shërbimeve shtetërore, bllokimi rrugëve nacionale, e deri tek ndonjë akt tjetër pak më i dhunshëm si thyerje xhamash të institucioneve shtetërore, etj..
Kavaja si provë e mosbindjes civile
Partia Demokratike po organizon të gjithë potencialin e saj njerëzor për të dielën e ardhshme në Kavajë, ku mbahen zgjedhjet për kryebashkiakun e ri. Në garë është vetëm PS-ja pas dorëheqjes së Elvis Roshit, i shkarkuar nga ligji i dekriminalizimit. PD-ja po synon të mbajë një miting po aq të madh sa 18 shkurti në Tiranë, të bllokojë qendrat e votimit që të mos lejojë zhvillimin e zgjedhjeve në qytetin që për dy dekada ka qenë bastion i së djathtës. Opozita i ka bërë llogaritë me këtë miting si beteja e fundit kundër Ramës para zgjedhjeve të 18 qershorit. “Nëse arrijmë të bllokojmë zhvillimin e zgjedhjeve në Kavajë, atëherë presim një tërheqje të Ramës dhe në vijim shtyrjen e zgjedhjeve parlamentare për në Shtator”- thanë burimet për tesheshi.com.
Mosbindja civile, pak histori
Mosbindja civile është refuzimi aktiv, i deklaruar, për t’iu bindur ligjeve të caktuara, kërkesave dhe urdhërave të një qeverie, ose pushteti ndërkombëtar. Mosbindja civile është një shkelje simbolike ose ritualiste e ligjit, në vend të refuzimit të sistemit në tërësi. Mosbindja civile nganjëherë përcaktohet si rezistencë e padhunshme, por nuk e përjashton dhunën.
Termi ka ardhur nga një ese klasike e Henry David Thoreau “Ese mbi mosbindjen civile” nga e cila janë frymëzuar Martin Luther King dhe shumë aktivistë të tjerë. Pasi leksionet e tij historike u botuan në vitin 1866, termi filloi të shfaqej në predikime dhe ligjërata të shumta në lidhje me skllavërinë dhe luftën në Meksikë.
Akti i parë i mosbindjes civile në botë njihet lëvizja e Mahatma Gandhi-t në 1893 gjatë lëvizjes indiane të pavarësisë. Lëvizja indiane kundër pushtimit britanik ka qenë jo e dhunshme. Më tej në revolucionin Velvet të Çekosllovakisë, në fazat e hershme të lëvizjes së pavarësisë së Bangladeshit kundër represionit pakistanez dhe në Gjermaninë Lindore për të rrëzuar qeveritë komuniste. Në Afrikën e Jugut në luftën kundër aparteidit, në Lëvizjen e të Drejtave Civile Amerikane, në revolucionin e vendeve baltike për pavarësinë nga Bashkimi Sovjetik, kohët e fundit me revolucionin “Rose” të vitit 2003 në Gjeorgji dhe Revolucionin “Portokalli” 2004 në Ukrainë, etj./tesheshi.com/
