Rusia nuk i ka pritur aspak mirë përfundimet mbi hetimin në Britani të vdekjes së Alexander Litvinenko-s, që thonë mes të tjerash se presidenti Vladidmir Putin mund ta ketë miratuar vrasjen e ish-agjentit të KGB-së.
Ndoshta është një shaka, ka deklaruar zëdhënësi i presidentit rus, Dmitry Peskov. “Me gjasa mund t’i atribuohet humorit të hollë britanik.”
Më pas ai i është rikthyer seriozitetit, duke thënë se Rusia do t’i japë të gjitha përgjigjet e nevojshme nëpërmjet kanaleve diplomatike.
“Gjysmëhetime të tilla si ky për të cilin po flasim sot mund ta helmojnë më tepër atmosferën e marrëdhënieve tona dypalëshe,” ka kujtuar Peskov.
Litvinenko, një ish-agjent dhe një kritik i Kremlinit, vdiq në Londër në nëntor të vitit 2006, tre javë pasi kishte pirë një çaj të helmuar me lëndë radioaktive. Që atëherë ka pasur një hetim për vdekjen e tij, dhe gishti është drejtuar gjithmonë te presidenti rus si frymëzues i eliminimit. /tesheshi.com/
