Zgjedhjet e 15 tetorit në Maqedoni shihen si përcaktuese nga Greqia për të nisur negociatat për çështjen e emrit me qeverinë e Zoran Zaev.
Ministri i Jashtëm grek, Nikos Kotzias, shprehet se zgjedhjet do të tregojnë nëse pozitat e qeverisë së re do të forcohen apo jo, në mënyrë që proçesi i negociatave të jetë serioz.
Sipas Kotzias, prapa problemit të emrit fshihet edhe problemi i irredentizmit te fqinji i tyre verior.
“Shpresoj dhe besoj se nga ana e tyre do të ndërmerren masa për kufizim të irredentizmit”, thotë shefi i diplomacisë greke dhe shton se për këtë temë në Neë York ka biseduar me homologun e tij të Maqedonisë, Nikolla Dimitrov, duke e cilësuar atë si “person jashtëzakonisht interesant”.
“U dakorduam për formimin e një komisioni të përbashkët nga nëntori i këtij viti, i cili në afat prej katër muajsh do të duhet ta përfundojë punën e vet – largimin e irredentizmit nga tekstet shkollore dhe hartat gjeografike në to. Ky është një hap shumë i rëndësishëm, por pasojnë edhe hapa tjerë për të cilët tanimë kemi diskutuar”, tha Kotzias.
Në pyetjen se a është i mundur anëtarësimi i Maqedonisë në NATO dhe BE pa zgjidhjen e kontestit të emrit, Kotzias u shpreh se është e domosdoshme që në fillim të mbyllet çështja e emrit siç është e paraparë edhe në Marrëveshjen e përkohshme.
Ndërsa për shkrimet në mediat greke se propozimi i Athinës zyrtare për emrin është “Maqedonia e Vardarit”, Kotzias tha se nga ana greke nuk janë dhënë propozime, ndërsa ato shkrime i vlerësoi si interpretime të lira të gazetarëve. /tesheshi.com/
