Kohët kanë ndryshuar. Vite më parë, të ishte pjesë e Milanit nënkuptonte një kulm në karrierë, kurse tani ekipi pa shkëlqimin e dikurshëm refuzohet dhe nga lojtarë që sapo kanë nisur karrierën.
Me refuzimin për të nënshkruar një kontratë të re, portieri 18-vjeçar i Milanit, Gianluigi Donnarumma, është kthyer në çështjen numër një në fushatën verore të transferimeve në Itali.
Donnarumma nënshkroi në vitin 2013 për ekipin e të rinjve të Milanit, dhe dy vite më pas do të bënte debutimin me ekipin e parë, kur ishte vetëm 16 vjeç.
I kthyer aty për aty në zgjedhje të parë për portën e Milanit, ai ka luajtur në 68 takime në dy sezonet e fundit. E ndërsa kontrata e tij merr fund vitin e ardhshëm, Donnarumma ka zgjedhur të refuzojë nënshkrimin e një kontrate të re.
“… Donnarumma ka marrë një vendim përfundimtar për të mos rinovuar kontratën me Milanin. Natyrisht që vendimi lë një shije të hidhur në gojë…,” ka qenë reagimi i Marco Fassone-s, një prej drejtuesve të Milanit.
Sky Sport Italia pretendon se Donnarumma e ka mendjen veç te Reali i Madridit, prandaj ka refuzuar si Milanin, ashtu dhe PSG-në, skuadrën e njohur franceze.
Me sytë te Reali, sipas këtij burimi informativ, Donnarumma nuk do të pranojë asnjë vendmbërritje tjetër gjatë kësaj vere, e nëse i reziston çdo shitjeje të mundshme gjer në fund të sezonit të ardhshëm, ai mund t’u bashkohet madrilenëve si një lojtar i lirë. /tesheshi.com/
