Ka nisur në stadiumin “Adem Jashari” në Mitrovicë, ceremonia e nderim të Isa Boletinit. Pasi është mbajtur një minutë heshtje, Kryetari i Kuvendit të Kosovës, Kadri Veseli u shpreh se heronjtë kthehen te fundit nga beteja.
Nga ana e tij, Kryeministri i Kosovës, Isa Mustafa deklaroi se Isa Boletini po i kthehet sot vendlindjes , pasi ka udhëtuar në qendrat kryesore kosovare nëpër të cilat përcolli mesazhin e unitetit dhe dashurisë pa kushte mes vëllezërve të një gjaku.
I pranishëm në këtë ceremoni, Presidenti i Shqipërisë, Bujar Nishani, u shpreh se “Shqipëria dhe Kosova, dy shtete shqiptare, janë shndërruar në faktorë të paqes dhe stabilitetit të qëndrueshëm në Ballkan”.
“Shqipëria evropiane, Kosova evropiane, Kosova anëtare e OKB-së dhe në NATO, Ballkani evropian, janë mundësia dhe çasti ynë historik”, theksoi presidenti shqiptar në manifestimin e madh në Mitrovicë.
Kreu i Partisë Demokratike, Lulzim Basha deklaroi në fjalën e rastit se Bacë Isa do të jetë mes nesh siç e meriton dhe siç ishte amaneti i tij. Basha tha se do t’ju tregojmë fëmijëve me krenari për heroin tonë, ndërsa më herët u shpreh se amaneti i Isës është dyfish i përmbush, pasi do të jetë në Kosovën e pavarur.
“Nga sot baca Isë do të prehet në tokën e tij, në Kullën e tij të pamposhtur, në Kosovën e lirë. Sot Mitrovica dhe familja Boletini realizojnë amanetin e tij, amanetin e gjithë shqiptarëve. Ky amanet është dyfish i përmbush, pasi që do të jetë në Kosovën e pavarur. Burra si Isa Boletini janë gjeneza e pavarësisë. Pavarësia e Shqipërisë kujtohet edhe me emrin e Isa Boletinit. I premtuan Isës armë e prona, por nuk e ndërroi kurrë me gurët e Boletinit sepse kishte besë dhe i kishte dhënë besë nga Mitrovica e deri në Vlorë. Ndihem krenar që jam sot bashkë me ju, që kam gjak si gjak i tij, dhe që do të përluem pranë varrit të tij për t’ju treguar fëmijëve tanë me krenari për heroin e kombit shqiptar, kush ishte Isa Boletini. Ai do të jetë mes nesh siç e meriton, siç ishte dhe është amaneti i tij, lavdi për jetë”- tha Basha./tesheshi.com/
